Kiyev rasmiy ravishda Berlindan Moskvagacha yetib borishga qodir — 500 kilometr masofaga uchadigan Taurus qanotli raketalarini so‘radi. Bu haqda Frankfurter Allgemeine Zeitung gazetasi manbalarga tayanib xabar berdi.
“Prezident Vladimir Zelenskiy may oyining boshida Berlinga tashrifi chog‘ida bu haqda kansler Olaf Sholsga gapirgan. Kansler matbuot kotibi izoh berishni istamayapti, biroq Federal Mudofaa vazirligi Ukraina Taurus’ni so‘rab murojaat qilganini tasdiqlaydi”, — deyiladi xabarda.
Gazetaning qayd etishicha, raketalar G‘arb avvalroq Kiyevga va’da bergan F-16 qiruvchilariga o‘xshab ketadi. Biroq Taurus raketalarining xususiyatlari va uzoq masofali ekanini hisobga olib, Berlin “ikki o‘t orasida qolgan”.
“Ukraina Taurus kabi qurollardan oqilona foydalanishiga hamma ham ishonmayapti. Nemis qanotli raketasi 500 kilometrgacha ucha oladi. U Ukraina chegarasidan Moskvagacha yetib boradi. Shuning uchun ham ayrimlar favqulodda zarurat tug‘ilganda Kiyev urushni nazoratsiz avj oldirib yuborishidan qo‘rqmoqda”, — deydi nashr.
Ukrainani Taurus qanotli raketalari bilan ta’minlash tashabbusini Bundestag deputati Roderix Kizevetter ilgari surgan.
Avvalroq Germaniya Ukrainaga 2,7 milliard dollarlik harbiy texnikalarni topshirishi haqida xabar berilgandi. Ular tarkibidan Leopard 1 tanklari, Marder piyodalar jangovar mashinalari va razvedkachi dronlar o‘rin olgan.
Izoh (0)