Polsha Seymi 2007-yildan 2022-yilgacha mamlakat ichki xavfsizligiga Rossiyaning ta’sirini tekshirish uchun davlat komissiyasini tuzish to‘g‘risidagi munozarali qonun loyihasini ma’qulladi. 26-may kuni parlament quyi palatasining 234 nafar deputati qonun loyihasini qabul qilish uchun ovoz berdi, 219 nafari qarshi chiqdi, yana biri betaraf qoldi. Qonun kuchga kirishi uchun uni Polsha prezidenti Anjey Duda imzolashi kerak.
Qonun loyihasiga ko‘ra, xususan, to‘qqiz kishilik komissiya tomonidan aybdor deb topilgan har qanday siyosatchiga mablag‘ taqsimoti bilan bog‘liq davlat lavozimlarini egallash o‘n yilga taqiqlanishi mumkin. Komissiya rahbarini bosh vazir Mateush Moravetskiy tayinlaydi.
“Muxolifatga qarshi qonun”
Muxolifat bu qarorni qoralab, uni siyosatchilarni sudyaga aylantiruvchi “konstitutsiyaviy davlat to‘ntarishi” deb atadi. Tanqidchilarning fikricha, ushbu qonun yordamida hukmron “Qonun va adolat” partiyasining milliy konservatorlari kuzgi parlament saylovlarida asosiy raqib — liberal muxolifat yetakchisi, sobiq bosh vazir Donald Tuskni yo‘q qilishga intilmoqda. “Ushbu qonunning maqsadi Tuskni siyosatdan haydashdir”, degandi “Fuqarolik platformasi” partiyasi bosh kotibi Marchin Kirvinskiy.
Yevropa kengashining sobiq prezidenti Donald Tusk 2007-yildan 2014-yilgacha Polsha bosh vaziri lavozimida ishlagan. Konservatorlar uni boshqa narsalar qatori Rossiya bilan norentabel gaz shartnomalarini imzolaganlikda ayblamoqda. Tusk “Qonun va adolat” partiyasining rahbari Yaroslav Kachinskiyning asosiy siyosiy raqibi sanaladi. Sobiq bosh vazir Polshaning eng yirik muxolifat partiyasi — liberal-konservativ “Fuqarolik platformasi”ni boshqaradi.
Izoh (0)