Киев расмий равишда Берлиндан Москвагача етиб боришга қодир — 500 километр масофага учадиган Taurus қанотли ракеталарини сўради. Бу ҳақда Frankfurter Allgemeine Zeitung газетаси манбаларга таяниб хабар берди.
“Президент Владимир Зеленский май ойининг бошида Берлинга ташрифи чоғида бу ҳақда канцлер Олаф Шольцга гапирган. Канцлер матбуот котиби изоҳ беришни истамаяпти, бироқ Федерал Мудофаа вазирлиги Украина Taurus’ни сўраб мурожаат қилганини тасдиқлайди”, — дейилади хабарда.
Газетанинг қайд этишича, ракеталар Ғарб аввалроқ Киевга ваъда берган F-16 қирувчиларига ўхшаб кетади. Бироқ Taurus ракеталарининг хусусиятлари ва узоқ масофали эканини ҳисобга олиб, Берлин “икки ўт орасида қолган”.
“Украина Taurus каби қуроллардан оқилона фойдаланишига ҳамма ҳам ишонмаяпти. Немис қанотли ракетаси 500 километргача уча олади. У Украина чегарасидан Москвагача етиб боради. Шунинг учун ҳам айримлар фавқулодда зарурат туғилганда Киев урушни назоратсиз авж олдириб юборишидан қўрқмоқда”, — дейди нашр.
Украинани Taurus қанотли ракеталари билан таъминлаш ташаббусини Бундестаг депутати Родерих Кизеветтер илгари сурган.
Аввалроқ Германия Украинага 2,7 миллиард долларлик ҳарбий техникаларни топшириши ҳақида хабар берилганди. Улар таркибидан Леопард 1 танклари, Marder пиёдалар жанговар машиналари ва разведкачи дронлар ўрин олган.
Изоҳ (0)