O‘zbekistonda 2023-yil 1-dekabrdan aholi va tadbirkorlardan 47 turdagi ma’lumotlar talabi bekor qilinadi. Bu haqda O‘zA xabar berdi.
Prezident qaroriga muvofiq, 2023-yil yakuniga qadar “my.gov.uz” portalida birinchi navbatda 95 ta xizmat va servislar ishga tushiriladi, kelgusida ko‘rsatilayotgan xizmatlar soni 570 taga yetkaziladi. Raqamli texnologiyalar bo‘yicha loyihalar samaradorligi, raqamli xizmat va servislar sifati va barqarorligi ustidan raqamli nazorat o‘rnatiladi.
Qarorga ko‘ra, “O‘zkomnazorat” inspeksiyasi 2023-yil 1-oktabrdan boshlab davlat organ va tashkilotlari tomonidan joriy etilgan raqamli texnologiyalar bo‘yicha loyihalar samaradorligi, ko‘rsatiladigan raqamli xizmat va servislar texnik faoliyatining sifati va barqarorligi ustidan raqamli nazorat o‘rnatadi.
Raqamli nazorat doirasida davlat organlari va tashkilotlarida raqamli texnologiyalar sohasidagi loyihalarning maqsadliligi, joriy etish darajasi, foydalanish holati, raqamli xizmat va servislar ishidagi uzilish, to‘xtalish va texnik-avariyalar, aloqa markazlari (ishonch telefonlari, call-markazlar, dispetcherlik aloqa) xizmatlarining bog‘lanish va samarali texnik faoliyat ko‘rsatish kabi sifat ko‘rsatkichlarini baholaydi.
Aloqa, axborotlashtirish va raqamli iqtisodiyot sohasidagi qonunchilik talablari buzilishlarini bartaraf etish yuzasidan respublika va mahalliy ijro etuvchi hokimiyat organlari va davlat tashkilotlariga ko‘rib chiqilishi majburiy bo‘lgan taqdimnomalar kiritish vakolati beriladi.
Izoh (0)