Ўзбекистонда аҳоли ва тадбиркорлардан 47 турдаги маълумотлар талаби бекор қилинади

Ўзбекистонда 2023 йил 1 декабрдан аҳоли ва тадбиркорлардан 47 турдаги маълумотлар талаби бекор қилинади. Бу ҳақда ЎзА хабар берди.

Президент қарорига мувофиқ, 2023 йил якунига қадар “my.gov.uz” порталида биринчи навбатда 95 та хизмат ва сервислар ишга туширилади, келгусида кўрсатилаётган хизматлар сони 570 тага етказилади. Рақамли технологиялар бўйича лойиҳалар самарадорлиги, рақамли хизмат ва сервислар сифати ва барқарорлиги устидан рақамли назорат ўрнатилади.    

Қарорга кўра, “Ўзкомназорат” инспекцияси 2023 йил 1-октябрдан бошлаб давлат орган ва ташкилотлари томонидан жорий этилган рақамли технологиялар бўйича лойиҳалар самарадорлиги, кўрсатиладиган рақамли хизмат ва сервислар техник фаолиятининг сифати ва барқарорлиги устидан рақамли назорат ўрнатади. 

Рақамли назорат доирасида давлат органлари ва ташкилотларида рақамли технологиялар соҳасидаги лойиҳаларнинг мақсадлилиги, жорий этиш даражаси, фойдаланиш ҳолати, рақамли хизмат ва сервислар ишидаги узилиш, тўхталиш ва техник-авариялар, алоқа марказлари (ишонч телефонлари, cаll-марказлар, диспетчерлик алоқа) хизматларининг боғланиш ва самарали техник фаолият кўрсатиш каби сифат кўрсаткичларини баҳолайди.  

Алоқа, ахборотлаштириш ва рақамли иқтисодиёт соҳасидаги қонунчилик талаблари бузилишларини бартараф этиш юзасидан республика ва маҳаллий ижро этувчи ҳокимият органлари ва давлат ташкилотларига кўриб чиқилиши мажбурий бўлган тақдимномалар киритиш ваколати берилади.