Toshkent shahri Yunusobod tumanidagi vaksina va zardoblar ilmiy-tadqiqot instituti hududida qurilish bo‘layotgani va hudud aholisi bundan norozi ekani haqida murojaat e’lon qilindi. Farmatsevtika tarmog‘ini rivojlantirish agentligi holatga munosabat bildirdi.
Qayd etilishicha, Toshkent vaksina va zardoblar ilmiy-tadqiqot instituti turli yuqumli kasalliklarni o‘rganish, tashxislash va ularning oldini olish kabi dolzarb muammolarni o‘rganuvchi yirik ilmiy markazlardan biri hisoblanadi. Toshkent vaksina va zardoblar ilmiy-tadqiqot instituti 100 yildan ortiq vaqt davomida 120 turdagi mahsulotlar orqali kuydirgi, vabo, bezgak, quturish, sil, qoqshol va boshqa kasalliklarga qarshi vaksina ishlab chiqargan.
Prezidentning 2020-yil 25-noyabrdagi “Biotexnologiyalarni rivojlantirish va mamlakatning biologik xavfsizligini ta’minlash tizimini takomillashtirish bo‘yicha kompleks chora-tadbirlar to‘g‘risida”gi qaroriga asosan mahalliy immunobiologik preparatlar yaratish, vaksina va zardoblar ishini hamda farmatsevtik biotexnologiyani rivojlantirish yo‘lida amalga oshirilayotgan ishlar qo‘llab-quvvatlangan. Shuningdek, qarorga asosan institutda 13 ta laboratoriya tashkil etilib, bugungi kunda o‘z faoliyatini davom ettirmoqda.
Agentlik axborot xizmatiga ko‘ra, xavfli kasalliklarning qo‘zg‘atuvchilari uzoq muddat davomida tashqi muhitda, ayniqsa quyosh tushmaydigan nam joylarda saqlanib qoladi. Institut hududida turli yuqumli va o‘ta xavfli kasalliklarga qarshi vaksinalar ishlab chiqarilganligini inobatga olib, qurilish ishlari aholi salomatligiga qanchalik xavf tug‘dirishini aniqlash maqsadida bugungi kunda o‘rganish ishlari olib borilmoqda. O‘rganish ishlari yakunlanganidan so‘ng qo‘shimcha ma’lumot beriladi.
Izoh (0)