Shavkat Mirziyoyev Toshkent shahridagi “3-Katta Chilonzor” mahallasiga tashrif buyurdi. Bu haqda prezident matbuot xizmati xabar berdi.
O‘zbekistonda barcha dasturlar aholi ehtiyojidan kelib chiqib, manzilli amalga oshirilmoqda. Buning uchun “mahalladagi beshlik” tizimi joriy etilib, ularga keng imkoniyatlar berildi. “Xavfsiz mahalla”, “Xavfsiz ko‘cha” konsepsiyalari hayotga tatbiq etilmoqda. Mahallalarning o‘ziga mablag‘ yo‘naltirilib, obod qilinmoqda.
“Yashil makon” umummilliy loyihasiga muvofiq, bo‘sh maydonlarga daraxt ko‘chatlari, rayhon, namozshomgul kabi gullar ekildi, maysazorlar tashkil etildi. Mahalla hududidan o‘tgan “Anhor” kanali bo‘yida saylgoh, piyodalar va velosiped yo‘laklari barpo etildi. Shuningdek, elektr podstansiyasi, transformator va past kuchlanishli kabellar yangilandi. Prezident bu o‘zgarishlarni ko‘zdan kechirdi. Shu yerda mahallalar faollari, nuroniylar bilan muloqot bo‘ldi.
“Bilasizlar, hamma ishlarimizni mahallada amalga oshiryapmiz. Agar mahalla obod bo‘lsa, oilalar tinch va daromadli bo‘lsa, o‘qish, izlanish, rivojlanish bo‘ladi. Shu bois bu tizimga qo‘shimcha vakolatlar beryapmiz. Bugun mahalla kambag‘allikni qisqartirish, xotin-qizlar muammosini hal qilish, yoshlar tarbiyasida katta kuchga aylanmoqda”, — dedi Shavkat Mirziyoyev.
Aholi vakillari buni mahalla hayotida sezayotgani, yoshlarni o‘qitish, ishga joylashtirish e’tiborda ekanini aytishdi. Chilonzordagi 55 ta mahallani obod qilish, ijtimoiy masalalarni hal qilishga 115 milliard so‘m ajratilgani qayd etildi. Bu yil Toshkent shahrining 585 ta mahallasiga 351 milliard so‘m, shundan Chilonzordagi 55 ta mahallaga 35 milliard so‘m yo‘naltirilishi ma’lum qilindi.
Prezident bandlik masalasiga alohida e’tibor qaratdi. Uchrashuvda prezident fuqarolar bilan ochiq, samimiy suhbatlashdi. “Xabaringiz bor, kambag‘allikni qisqartirish va aholi bandligini ta’minlash bo‘yicha yangi tizim asosida ish boshladik. Bunda mahallalardagi ishsizlar salohiyatli tadbirkorlarga biriktiriladi. Chilonzor tumanida 10 ming nafar ishsiz fuqaroning bandligini ta’minlashimiz kerak. O‘ylaymanki, tadbirkorlar bu bo‘yicha o‘ziga mas’uliyat olib, nuroniylar bosh-qosh bo‘ladi”, — dedi davlat rahbari.
Izoh (0)