O‘zbekiston prezidenti Shavkat Mirziyoyev 18-19-may kunlari davlat tashrifi bilan Xitoy Xalq Respublikasida bo‘ladi.
Tashrif arafasida 17-may kuni Sian shahrida O‘zbekiston–Xitoy biznes-forumi bo‘lib o‘tdi. Forum davomida 20 dan ortiq kelishuvlar va shartnomalar imzolandi.
Sirdaryo viloyati, Shirin shahri hokimi Sarvarbek Sultonov mazkur forumda erishilgan kelishuvlar bo‘yicha intervyu berdi.
“Biz drayver sohamiz bo‘lgan energetika sohasining ilg‘or tajribalarini, xususan, Xitoyning bu boradagi yutuqlarini o‘rgandik. Shu bilan birga Xitoy kompaniyasi bilan Shirin energetika kollejida qisqa muddatli kurs tashkillashtirmoqchimiz.
Sirdaryo issiqlik elektr stansiyasi, Farhod gidro elektr stansiyasi va yurtboshimizning alohida eʼtibori bilan Boyovut hamda Shirin shahri hududida ham korxonalar o‘z faoliyatlarini olib bormoqda. Mazkur ishlab chiqarish quvvati bugungi kunda O‘zbekistonni 33% elektr energiyasi quvvati bilan taʼminlamoqda”, — deydi u.
Hokim prezident farmonida har bir hududda yashil energetika sohasiga eʼtibor berish vazifasini belgilab berganini aytdi.
“Shundan kelib chiqib, biz ham alohida o‘z vazifalarimizni belgilab oldik. Qarorda aynan tadbirkorlik subyektlarida va aholi xonadonlarida, mavjud budjet tashkilotlarida ham yashil energetikani keng joriy qilish vazifalari qayd etilgan. Oldimizga qo‘yilgan masala – yashil energetika sohasini keng joriy qilish. Bundan maqsad – turli holatlardan xoli bo‘lish. Hammamiz bilamizki, ishlab chiqarish quvvatlarining kengayayotganligi energetikaga bo‘lgan talabning oshishiga sabab bo‘ladi. Shundan kelib chiqib, aholi orasida keng targ‘ibot ishlarini olib boryapmiz. Qisqa muddatli o‘quv kurslarini tashkil etishimizdan maqsad ham shu”, — deydi Sarvarbek Sultonov.
Hokimning qo‘shimcha qilishicha, yashil energetikani aholi xonadonlariga o‘rnatish mumkin, lekin unga xizmatlar ko‘rsatish sohasiga eʼtibor qaratilmasa, maʼlum muddatdan keyin kutilgan natija bo‘lmay qolishi mumkin.
“Shuning uchun ham imkoniyatimizdan foydalanib, Shirin energetika kolleji negizida Xitoy kompaniyasi bilan hamkorlikda 3 oydan 5 oygacha bo‘lgan qisqa muddatli kurslarni tashkil etyapmiz. Maqsadimiz – tor doiradagi mutaxassislarni tezkor tayyorlash. Bu yo‘nalishda nafaqat Sirdaryo, balki butun O‘zbekiston uchun mutaxassis yetishtirishimiz kerak. Yangidan yangi ish o‘rinlari yaratiladi, shu bilan birga, aholiga xizmat ko‘rsatuvchi mutaxassislar tayyorlanadi. Bugungi kunda Shirin shahridagi budjet tashkilotlarida to‘la reja qoplandi”, — deydi u.
Shirin shahri hokimi Sirdaryo viloyati bo‘yicha ishchi guruh tuzilgani va ular ijtimoiy himoyaga muhtojlarni ro‘yxatga olishganini aytdi.
“Ularning orasidan haqiqiy muhtoj deb topilganlarga bosqichma-bosqich o‘rnatib berilyapti”, — deya qo‘shimcha qiladi hokim.
Izoh (0)