“Хитой компанияси билан Ширин энергетика коллежида яшил энергетика бўйича курс ташкиллаштирмоқчимиз” — Ширин шаҳри ҳокими

Ўзбекистон президенти Шавкат Мирзиёев 18-19 май кунлари давлат ташрифи билан Хитой Халқ Республикасида бўлади. 

Ташриф арафасида 17 май куни Сиан шаҳрида Ўзбекистон–Хитой бизнес-форуми бўлиб ўтди. Форум давомида 20 дан ортиқ келишувлар ва шартномалар имзоланди.

Сирдарё вилояти, Ширин шаҳри ҳокими Сарварбек Султонов мазкур форумда эришилган келишувлар бўйича интервью берди.

“Биз драйвер соҳамиз бўлган энергетика соҳасининг илғор тажрибаларини, хусусан, Хитойнинг бу борадаги ютуқларини ўргандик. Шу билан бирга Хитой  компанияси билан Ширин энергетика коллежида қисқа муддатли курс ташкиллаштирмоқчимиз. 

Сирдарё иссиқлик электр станцияси, Фарҳод гидро электр станцияси ва юртбошимизнинг алоҳида эътибори билан Боёвут ҳамда Ширин шаҳри ҳудудида ҳам корхоналар ўз фаолиятларини олиб бормоқда. Мазкур ишлаб чиқариш қуввати бугунги кунда Ўзбекистонни 33% электр энергияси қуввати билан таъминламоқда”, — дейди у.

Ҳоким президент фармонида ҳар бир ҳудудда яшил энергетика соҳасига эътибор бериш вазифасини белгилаб берганини айтди.

“Шундан келиб чиқиб, биз ҳам алоҳида ўз вазифаларимизни белгилаб олдик. Қарорда айнан тадбиркорлик субъектларида ва аҳоли хонадонларида, мавжуд бюджет ташкилотларида ҳам яшил энергетикани кенг жорий қилиш вазифалари қайд этилган. Олдимизга қўйилган масала – яшил энергетика соҳасини кенг жорий қилиш. Бундан мақсад – турли ҳолатлардан холи бўлиш. Ҳаммамиз биламизки, ишлаб чиқариш қувватларининг кенгаяётганлиги энергетикага бўлган талабнинг ошишига сабаб бўлади. Шундан келиб чиқиб, аҳоли орасида кенг тарғибот ишларини олиб боряпмиз. Қисқа муддатли ўқув курсларини ташкил этишимиздан мақсад ҳам шу”, — дейди Сарварбек Султонов.

Ҳокимнинг қўшимча қилишича, яшил энергетикани аҳоли хонадонларига ўрнатиш мумкин, лекин унга хизматлар кўрсатиш соҳасига эътибор қаратилмаса, маълум муддатдан кейин кутилган натижа бўлмай қолиши мумкин. 

“Шунинг учун ҳам имкониятимиздан фойдаланиб, Ширин энергетика коллежи негизида Хитой компанияси билан ҳамкорликда 3 ойдан 5 ойгача бўлган қисқа муддатли курсларни ташкил этяпмиз. Мақсадимиз – тор доирадаги мутахассисларни тезкор тайёрлаш. Бу йўналишда нафақат Сирдарё, балки бутун Ўзбекистон учун мутахассис етиштиришимиз керак. Янгидан янги иш ўринлари яратилади, шу билан бирга, аҳолига хизмат кўрсатувчи мутахассислар тайёрланади. Бугунги кунда Ширин шаҳридаги бюджет ташкилотларида тўла режа қопланди”, — дейди у.

Ширин шаҳри ҳокими Сирдарё вилояти бўйича ишчи гуруҳ тузилгани ва улар ижтимоий ҳимояга муҳтожларни рўйхатга олишганини айтди. 

“Уларнинг орасидан ҳақиқий муҳтож деб топилганларга босқичма-босқич ўрнатиб бериляпти”, — дея қўшимча қилади ҳоким.