Qashqadaryo viloyati Nishon tumanidagi bog‘da 8-may kuni yigit attraksiondan uchib ketdi. Viloyat Ichki ishlar boshqarmasi holat yuzasidan ma’lumot berdi.
Qayd etilishicha, fuqaro U.N. o‘rtoqlari bilan Nuriston shaharchasidagi istirohat bog‘iga borib, attraksionda uchayotgan vaqtda ro‘parasidagi o‘rindiqqa o‘tish uchun joyidan turib, ehtiyotsizligi oqibatida yiqilib tushgan.
Hodisa oqibatida uning o‘ng qo‘li sinib, Nishon tuman markaziy shifoxonasiga murojaat qilgan. Shifoxonada davo muolajalarini olib, uyiga ketgan. Hozirda holat yuzasidan tuman ichki ishlar bo‘limi tomonidan surishtiruv ishlari olib borilmoqda.
Qashqadaryo viloyati Favqulodda vaziyatlar boshqarmasi ham ijtimoiy tarmoqda tarqalgan video yuzasidan ma’lumot bergan. Ammo axborotda holat viloyat hududida sodir bo‘lmagani qayd etilgan. Boshqarma jamoatchilik faollarini tekshirilmagan axborotni tarqatmaslikka chaqirgan.
“Barcha shahar-tuman FVB va Sanoat xavfsizligi hududiy bo‘lim mas’ullari tomonidan vaziyat bo‘yicha joylardagi istirohat bog‘larida o‘rganish ishlari olib borildi. Mutaxassislarning bergan ma’lumotiga ko‘ra, tasvirlardagi manzil Qashqadaryo viloyatining shahar-tumanlarida mavjud attraksionlarni joylashuvini takrorlamaydi”, — deyiladi xabarda.
Izoh (0)