Қашқадарё вилояти Нишон туманидаги боғда 8 май куни йигит аттракциондан учиб кетди. Вилоят Ички ишлар бошқармаси ҳолат юзасидан маълумот берди.
Қайд этилишича, фуқаро У.Н. ўртоқлари билан Нуристон шаҳарчасидаги истироҳат боғига бориб, аттракционда учаётган вақтда рўпарасидаги ўриндиққа ўтиш учун жойидан туриб, эҳтиётсизлиги оқибатида йиқилиб тушган.
Ҳодиса оқибатида унинг ўнг қўли синиб, Нишон туман марказий шифохонасига мурожаат қилган. Шифохонада даво муолажаларини олиб, уйига кетган. Ҳозирда ҳолат юзасидан туман ички ишлар бўлими томонидан суриштирув ишлари олиб борилмоқда.
Қашқадарё вилояти Фавқулодда вазиятлар бошқармаси ҳам ижтимоий тармоқда тарқалган видео юзасидан маълумот берган. Аммо ахборотда ҳолат вилоят ҳудудида содир бўлмагани қайд этилган. Бошқарма жамоатчилик фаолларини текширилмаган ахборотни тарқатмасликка чақирган.
“Барча шаҳар-туман ФВБ ва Саноат хавфсизлиги ҳудудий бўлим масъуллари томонидан вазият бўйича жойлардаги истироҳат боғларида ўрганиш ишлари олиб борилди. Мутахассисларнинг берган маълумотига кўра, тасвирлардаги манзил Қашқадарё вилоятининг шаҳар-туманларида мавжуд аттракционларни жойлашувини такрорламайди”, — дейилади хабарда.
Изоҳ (0)