Ukraina prezidenti Vladimir Zelenskiy bir qator Afrika davlatlarining tinchlik tashabbusini olqishladi. Bu haqda prezident matbuot xizmatiga tayanib, “Ukrainskaya pravda” xabar berdi.
Janubiy Afrika Respublikasi prezidenti Siril Ramafosa 13-may kuni telefon orqali muloqoti chog‘ida Zelenskiyga Afrikaning bir necha davlati missiyasi doirasida Ukrainaga tashrif buyurish niyatini bildirgan.
“Ukraina prezidenti mazkur tinchlik tashabbusini olqishladi. Zelenskiy Ukrainada hurmatli mehmonlarni qabul qilishga, ularning takliflarini tinglashga, Ukraina tinchlik formulasi haqida gapirishga va unga qo‘shilishga jalb qilishga tayyor”, — deydi Ukraina prezidenti matbuot kotibi.
Janubiy Afrika prezidentining tinchlik tashabbusi
16-may kuni Siril Ramafosa Afrika davlatlari Ukrainadagi urushni to‘xtatish bo‘yicha yangi tashabbusni taklif qilganini daʼvo qildi. Misr, Janubiy Afrika, Uganda, Senegal, Zambiya va Kongo Respublikasi vositachilik harakatlarida ishtirok etadi, dedi u.
Ramafosaning aytishicha, Afrika yetakchilaridan iborat delegatsiya imkon qadar tezroq tinchlik rejasini taqdim etish uchun Kiyev va Moskvaga tashrif buyurishni rejalashtirmoqda.
JAR prezidenti ikki davlat rahbarlari bilan ushbu masala bo‘yicha o‘zaro hamkorlikka tayyorgarlik ko‘rishni boshlashga kelishib olgan. Birlashgan Millatlar Tashkiloti bosh kotibi Antoniu Guterrish, Afrika Ittifoqi ofisi, AQSH, Britaniya va Yevropa Ittifoqi tashabbus haqida allaqachon xabardor qilingan.
Ma’lumot o‘rnida, JAR BMTning Rossiyani Ukraina hududidan qo‘shinlarini olib chiqishga chaqiruvchi rezolyutsiyasi uchun ovoz berishda betaraf qolgan, shu sababli G‘arb davlatlari Afrika davlatini Rossiyaning Afrikadagi eng yaqin ittifoqchilaridan biri deb hisoblay boshlagan. Keyinroq AQSH elchisi Ruben Brigetti JARni Rossiya armiyasiga qurol yetkazib berishda ayblagan.
Izoh (0)