O‘tgan sutka davomida Ukrainadagi janglarda 610 nafar rossiyalik harbiy halok bo‘ldi, deya xabar bermoqda Ukraina Qurolli kuchlari Bosh shtabi. Idora 17-may kuni ertalab e’lon qilgan hisobotga ko‘ra, Rossiyaning keng ko‘lamli bosqini boshidan beri Ukrainada halok bo‘lgan rossiyalik harbiylar soni 200 590 kishiga yetdi.
Bosh shtab maʼlumotlariga ko‘ra, 2022-yil 24-fevraldan buyon Ukraina harbiylari Rossiyaning jami 3 771 ta tankini, 7 365 ta zirhli texnikasi, 3 166 ta artilleriya tizimi, 318 ta havo mudofaa tizimi, 308 ta samolyot, 294 ta vertolyot, 2 748 ta dron, 982 ta qanotli raketa, 18 ta kema, 6 067 ta avtomobil va 417 ta maxsus texnikasini yo‘q qilgan.
Ukraina Qurolli kuchlarining o‘z yo‘qotishlari haqidagi ma’lumotlar oshkor etilmagan.
Rossiya Mudofaa vazirligi oxirgi marta 2022-yil 21-sentabrda urushdagi yo‘qotishlar haqida rasman hisobot bergan edi. O‘shanda vazirlik 5 937 nafar rossiyalik harbiy halok bo‘lganini e’lon qilgan.
Aprel oyida The New York Times AQSH razvedka xizmatlarining internetda tarqalgan hujjatlariga tayanib, Rossiya Federal xavfsizlik xizmati mamlakat Mudofaa vazirligini “Rossiyaning Ukrainadagi yo‘qotishlarini yashirganlikda ayblayotgani” haqida xabar bergandi. Razvedka xizmati ma’lumotlariga ko‘ra, vazirlik o‘z hisobotlarida Milliy gvardiya jangchilari, “Vagner” yollanma askarlari va Chechenistondan Ukrainaga yuborilgan harbiylar orasidagi yo‘qotishlarni hisobga kiritmayapti. FXX versiyasiga ko‘ra, Ukrainada o‘ldirilgan va yaralangan Rossiya harbiylari soni taxminan 110 ming kishini tashkil qiladi.
Izoh (0)