Polsha Rossiya bilan chegara yaqinida joylashtirish uchun Amerikaning HIMARS yoppasiga o‘t ochuvchi reaktiv tizimlari birinchi partiyasini oldi. Bu haqda mamlakat mudofaa vaziri Mariush Blashakka tayanib Euronews xabar berdi.
Mart oyida Polsha mudofaa vazirligi reaktiv tizimlar Kaliningrad bilan chegaradan 80 kilometr uzoqlikdagi Olshtin shahrida joylashgan harbiy qism tomonidan qo‘llanilishini ma’lum qilgandi. Blashakning so‘zlariga ko‘ra, HIMARS “mamlakatning sharqiy qanoti va NATOdagi Polsha armiyasini kuchaytiradi”.
Varshava 2019-yilda AQSHdan 20 ta HIMARS sotib olish bo‘yicha kelishuvga erishgandi, hozirda tizimlarning birinchi partiyasini oldi. Bundan tashqari Polsha hukumatidagilar Vashington bilan ko‘proq qurol yetkazib berish bo‘yicha muzokara olib borayotganini aytishmoqda.
“AQSH Kongressi Polshaga 500 ga yaqin raketa uchirish moslamalarini sotishni ma’qulladi. Ular Polshaga imkon qadar tezroq yetkazib beriladi”, — dedi Polsha mudofaa vaziri. Shuningdek, u yangi shartnoma bo‘yicha HIMARS tizimlarini Polshada birgalikda ishlab chiqarishning yo‘lga qo‘yilishi mumkinligiga umid bildirdi.
Eslatib o‘tamiz, Polsha mudofaa xarajatlarini sezilarli darajada, mamlakat yalpi ichki mahsulotining to‘rt foizigacha oshirish rejalarini e’lon qilgan. Polsha bosh vaziri Mateush Moravetskiy Rossiyaning Ukrainaga bostirib kirishi fonida Polshani “tezroq” qurollantirish zarurligini tushuntirgan.
Izoh (0)