Qashqadaryo viloyatining Qarshi shahrida IIB mansabdori va shahar prokurori telefon orqali muloqot qilgani, unda IIB mansabdori prokurorning noqonuniy topshirig‘ini bajarishdan bosh tortib, xalqni sevishini aytgani xabar berilgandi. Keyinchalik Bosh prokuratura Qarshi shahar 4-sonli IIB bo‘limi boshlig‘ini soxta obro‘ orttirishga urinishda aybladi. Tarmoqlarda tarqalgan audioyozuvdan maʼlum bo‘lishicha, shahar prokurori tadbirkorga tegishli savdo do‘konini sud qarorisiz buzdirishga, buni IIB xodimlari orqali bajarishga harakat qilgan.
Maʼlum qilinishicha, Qarshi shahar prokurori Alisher Mirzayev telefon orqali suhbatdoshi bilan gaplashib, voqea joyida nima bo‘layotganini so‘ragan.
“Ustiga benzin sepdi, lekin yoqmadi. Tez yordam kelib olib ketdi”, — deydi prokurorning nima bo‘lgani bilan qiziqishiga javob bergan suhbatdosh.
“Sudning qarori qachon chiqar ekan?”, deydi shahar prokurori ekani aytilayotgan ovoz egasi. Savolga javob bergan suhbatdosh esa “18-da bo‘lar ekan, xo‘jayin”, deydi. “Bo‘ldi unda, ‘otboy’”, deya gapini tugatadi masʼul.
“Do‘konchining xotini ustiga benzin sepgani, IIB mansabdorining prokurorga noqonuniy topshirig‘ini bajarmayman degani Bosh prokuratura bergan maʼlumotga tayanilsa, 2023-yilning 13-aprel kuni bo‘lib o‘tgan. Demak, Qarshi shahri prokurori 13-aprel kuni sud 18-aprelda qanday qaror chiqarishini oldindan bilgan bo‘lib chiqmoqdami? IIB mansabdori bajarmayman, degan paytda sud qarorisiz bunaqa noqonuniy topshiriqlarni bajarmayman deganmi shunda?”, deya savol beradi bu haqda jamoatchilikka axborot tarqatgan kanal muallifi.
“Daryo” voqealar rivojini kuzatishda davom etadi.
Izoh (0)