O‘zbekiston gaz qazib olishni kamaytirib, importni keskin oshirdi

O‘zbekiston 2023-yilning birinchi choragida 152,9 mln dollarlik gaz import qildi. Bu haqda Statistika agentlgi hisobotidan ma’lum bo‘ldi. 

Yanvar—mart oylaridagi gaz importi 2022-yilning mos davriga nisbatan 2,6 barobarga ko‘proq bo‘ldi. Birinchi chorakda amalga oshirilgan gaz importining deyarli hammasi mart oyiga to‘g‘ri kelgan — 151,2 mln dollar. 

Gaz eksporti bo‘yicha vaziyat umuman boshqacha. Uch oyda 27,4 mln dollarlik gaz eksport qilingan va bu 2022-yilning ilk choragiga nisbatan 70,6 foizga kamroq. 

Shuningdek, ko‘rib chiqilayotgan davrda 34,4 mln dollarlik elektr energiyasi import qilingan bo‘lsa, bu borada eksport 18,9 mln dollarni tashkil qilgan.

Elektr energiyasi importi 2022-yilga nisbatan 19,6 foizga, eksporti esa 56,7 foizga kamaygan. 

Uch oyda neft mahsulotlari eksporti 41,5 foizga oshib 39,5 mln dollarni tashkil qilgan. Mazkur mahsulotlarning importi 510 mln dollarga yetib, 43,3 foizga oshgan. 

Avvalroq O‘zbekistonda yil boshidan beri gaz qazib olish va elektr energiyasi ishlab chiqarish hajmi kamaygani haqida xabar berilgan edi.