Amerikalik tadbirkor Ilon Mask Twitter ijtimoiy tarmog‘i bosh direktorligi lavozimi tark etadi. Bu haqda uning o‘zi mikroblogiga yozib qoldirdi.
Maskning so‘zlariga ko‘ra, u yangi bosh direktor topib bo‘lgan. Biznemen o‘z o‘rnini egallaydigan inson kimligini oshkor etmagan, biroq u ayol kishiligini ma’lum qildi. Yangi bosh direktor taxminan olti haftadan keyin ishga kirishadi.
Maskning o‘zi kompaniya direktorlar kengashi raisi va texnik direktor lavozimini egallaydi. U nima sababdan bosh direktorlikdan ketayotganiga izoh bermagan.
2022-yil oktabrda Mask Twitter’ni 44 milliard dollarga sotib olish bo‘yicha oldi-sotdi bitimi rasman yakunlanganini ma’lum qilgandi. Shundan keyin biznesmen avvalgi rahbariyatni — kompaniya bosh va moliyaviy direktorlari Parag Aragval va Ned Sigalni, shuningdek, huquqshunos Vijayu Gaddeni ishdan bo‘shatgan.
27-oktabr kuni Mask Twitter sahifasidagi maqomini Chief Twitter’ga o‘zgartirdi va o‘zining rakovinasi bilan Twitter ofisiga ko‘chib o‘tgani haqidagi videoni e’lon qildi.
O‘sha kuni biznesmen Twitter’ni nima sababdan sotib olganiga izoh berdi va buni odamlar kelajakda turli fikrlarni muhokama qilish uchun raqamli maydonga ega bo‘lishi uchun amalga oshirganini aytdi. “Men buni o‘zim sevgan insoniyatga yordam berish uchun qildim”, — deb yozgan Mask. Uning qo‘shimcha qilishicha, “barcha sa’y-harakatlarimizga qaramay, maqsadga erisha olmaslik bu — real ehtimoldir”.
Izoh (0)