Rossiya Mudofaa vazirligi mamlakat armiyasining jangovar harakatlar olib borilayotgan nuqtalardagi “mudofaasi yorib o‘tilgani” haqidagi xabarlar haqiqatga to‘g‘ri kelmasligini ma’lum qildi.
Harbiy idoraga ko‘ra, harbiy operatsiya o‘tkazilayotgan hududdagi umumiy vaziyat nazorat ostida. Ta’kidlanishicha, Zaporojye va Xerson, shuningdek, Kupyansk yo‘nalishlarida “faol harakatlari olib borilmayapti”.
“Ayni vaqtda Ukraina Qurolli kuchlarining ‘Maloilinovka’ aholi punkti yo‘nalishidagi hujumini qaytarish bo‘yicha janglar olib borilyapti. Armiya va shturm aviatsiyasi, shuningdek, artilleriya ishga tushirilgan. Dushman ham jon, ham texnika borasida katta yo‘qotishlarga uchramoqda”, — deyiladi Mudofaa vazirligi press-relizida.
G‘arb davlatlari Ukraina yaqin vaqtlarda qarshi hujumga o‘tishini kutmoqda. Biroq Buyuk Britaniyaning hisoblashicha, u mojaroni hal etishga xizmat qilmaydi. 9-may kuni AQSH davlat kotibi Entoni Blinken Kiyev qarshi hujum uchun kerakli barcha narsani olganini ma’lum qildi. Ukraina TIV rahbari Dmitriy Kuleba Kiyev qarshi hujumda muvaffaqiyatga uchramasa, yana bitta hujum bo‘lishini aytdi.
Ukraina prezidenti Vladimir Zelenskiy Yevropa OAVlariga bergan intervyusida Ukraina Qurolli kuchlariga mamlakat sharqida qarshi hujumga tayyorgarlik ko‘rish uchun biroz ko‘proq vaqt kerakligini ma’lum qilgandi.
Izoh (0)