Turkiya prezidentligiga nomzod, Vatan partiyasi yetakchisi Muharrem Inje 14-may, yakshanba kuni bo‘lib o‘tadigan saylovlardan chiqishini ma’lum qildi. Bu haqda Anadolu xabar berdi.
Inje mazkur xatti-harakatiga saylovoldi tashviqoti paytida unga zarba bergan kompromatlar to‘lqini sabab bo‘lganini aytdi. Siyosatchi 45 kun davomida uning soxta, kompromat suratlari turk ommaviy axborot vositalarida tarqalib ketgani va huquq-tartibot idoralari bu faktlarni tekshirishdan chetlashganini ta’kidladi.
Inje, shuningdek, davlat uning mamlakat fuqarosi va Turkiya prezidentligiga nomzod sifatidagi obro‘sini himoya qila olmaganini bildirdi.
Deutsche Welle nashriga ko‘ra, Inje prezidentlik poygasida biror nomzod foydasiga o‘z nomzodini qaytarib olayotganini aytmagan. Shuningdek, Turkiya fuqarolarini 14-may kuni prezidentlik saylovlari bilan parallel ravishda o‘tkaziladigan parlament saylovlarida ham o‘z partiyasiga ovoz berishga chaqirgan.
2018-yilda Erdo‘g‘onga saylovda mag‘lub bo‘lgan Muharrem Inje hukmron Adolat va taraqqiyot partiyasining “himoyachisi” bo‘lganlikda ayblangan.
Turkiyalik ijtimoiy tarmoq foydalanuvchilari va tahlilchilarining qayd etishicha, Inje hukmron partiya va uning yetakchisini tanqid qilish o‘rniga asosiy e’tiborni muxolifat nomzodiga qaratgan. Masalan, u hukmron partiyani qo‘llab-quvvatlagan va Qilichdoro‘g‘lini FETO (Fetullahchi Terör Örgütü) bilan aloqada bo‘lganlikda ayblagan — turk rasmiylari Gullen Harakatini shunday ataydi va uning nomiga “terror tashkiloti” so‘zini qo‘shib foydalanadi.
Amaldagi qonunchilikka ko‘ra, Turkiya prezidentligiga nomzodlardan biri g‘alaba qozonish uchun 50 foizdan ko‘proq ovoz to‘plashi kerak. Agar ularning hech biri buni uddalay olmasa, ovoz berish yetakchilari o‘rtasida ikkinchi tur o‘tkaziladi — u 28 mayga belgilangan.
Izoh (0)