Sobiq Ichki ishlar xodimi, Toshkent shahrida YPX mansabdori lavozimida ishlagan O‘ktam Yangiboyev ichki ishlar vaziri Po‘lat Bobojonov qabulida bo‘lib, lavozimidan nohaq olinganini, unga nisbatan o‘tkazilgan xizmat tekshiruvi adolatsiz bo‘lganini aytib, ko‘mak so‘radi. Bu haqda sayyor qabulda ishtirok etgan “Daryo” jurnalisti xabar berdi.
Murojaatchining tushuntirish berishicha, asli qashqadaryolik O‘ktam Yangiboyev 2004-yildan 2020-yilga qadar Toshkent shahar IIB Yo‘l harakati xavfsizligi boshqarmasida masʼul lavozimda ishlagan bo‘lib, 2020-yilda Yo‘l harakati xavfsizligi boshqarmasi boshliqlarining asossiz harakatlari sabab nohaq ishdan bo‘shatilgan.
“Toshkent shahridagi uchta tuman hududida yo‘l harakati xavfsizligi xodimlariga masʼul bo‘lganim bois, bayram kunlari uyimga ham borolmay qolgan vaqtlarim bo‘lgan. Shunday kunlarning birida qo‘l ostimda ishlovchi, men yashaydigan hududda istiqomat qiluvchi xodimimga uyga qilgan bozor-o‘charimni berib yuborganman. Bu holatni boshqarma xodimlari rasmga olib, rahbariyatga noto‘g‘ri axborot yetkazgan. Shu voqea sabab mening ustimdan xizmat tekshiruvi tayinlanib, ishdan bo‘shatilganman”, — deydi ichki ishlar vaziri qabulida bo‘lgan sobiq IIB xodimi.
Murojaatchining maʼlumot berishicha, u Ichki ishlar tizimida 20 yil davomida xizmat qilgan.
“Bugun ichki ishlar vaziri qabuliga kelib, adolat so‘radim. Bor voqeani vazirning shaxsan o‘ziga aytib, mening ustimdan chiqarilgan hukm adolatsiz ekanini, bu holatni qayta ko‘rib chiqib, adolatni tiklashlari lozimligini so‘radim”, — deydi O‘ktam Yangiboyev.
Ichki ishlar vaziri Po‘lat Bobojonov mazkur murojaat shaxsan o‘zining nazoratida ekanini aytib, holat qayta ko‘rib chiqilishini, adolatli qaror chiqarilishini bildirdi.
Po‘lat Bobojonovning bugungi qabulida, shuningdek, oliy o‘quv yurtlarida o‘qib kontrakt pulini to‘lashga qiynalgan uch nafar yoshga 3 million so‘mdan, ikki nafariga 2 million so‘mdan pul mablag‘lari to‘lab berilgan.
“Uch nafar fuqaroga nogironlar aravachasi hamda aholi bandligini taʼminlash maqsadida 21 nafar fuqaroga subsidiya asosida tikuv mashinalari topshirildi.
Murojaatlarni ko‘rib chiqishda aholining ehtiyojlari va talablariga tayangan holda uzoq vaqtdan buyon yechimini topmayotgan muammolarni hal etishga, jismoniy va yuridik shaxslarning huquqlarini amalda tiklanishiga alohida eʼtibor qaratilmoqda”, — deydi Qashqadaryo viloyat IIB axborot xizmati rahbari Javlon Baxtiyev.
Izoh (0)