O‘zbekistonda dam olish kunidan boshlab havo harorati pasayadi

O‘zbekiston hududiga 14—17-may kunlari Kaspiy dengizining janubiy hududlaridan nam havo, so‘ngra Volga bo‘yi hududlaridan salqin havo kirib kelishi kutilmoqda, deb xabar berdi “O‘zgidromet” direktori.

Ma’lum qilinishicha, 14—17-may kunlari respublika hududida vaqti-vaqti bilan yomg‘ir yog‘adi, momaqaldiroq bo‘lishi mumkin.

14—16-may kunlari Qoraqalpog‘iston Respublikasi, Xorazm viloyatida, 17-mayda Buxoro, Navoiy, Toshkent, Samarqand, Jizzax, Qashqadaryo viloyatlarida va respublikaning tog‘li hududlarida ba’zi joylarda kuchli yomg‘ir yog‘adi. Ayrim joylarda do‘l yog‘ishi mumkin.

Yuqori tog‘li (2000 metrdan yuqori) hududlarda yomg‘ir qorga aylanishi mumkin.

14—15-mayda shimolda va cho‘l hududlarda, 16—17-mayda respublika bo‘yicha ba’zi joylarda shamol tezligi 15-20 metr/sekundgacha kuchayishi kutilmoqda, ba’zida 23-25 metr/sekundgacha kuchayishi, ayrim joylarda chang-to‘zonlar bilan kuzatilishi mumkin.

14—16-mayda respublika shimolida, 17-mayda respublikaning qolgan hududlarida kunduzgi havo harorati 17-22 darajagacha pasayadi.