Собиқ Ички ишлар ходими, Тошкент шаҳрида ЙПХ мансабдори лавозимида ишлаган Ўктам Янгибоев ички ишлар вазири Пўлат Бобожонов қабулида бўлиб, лавозимидан ноҳақ олинганини, унга нисбатан ўтказилган хизмат текшируви адолатсиз бўлганини айтиб, кўмак сўради. Бу ҳақда сайёр қабулда иштирок этган “Дарё” журналисти хабар берди.
Мурожаатчининг тушунтириш беришича, асли қашқадарёлик Ўктам Янгибоев 2004 йилдан 2020 йилга қадар Тошкент шаҳар ИИБ Йўл ҳаракати хавфсизлиги бошқармасида масъул лавозимда ишлаган бўлиб, 2020 йилда Йўл ҳаракати хавфсизлиги бошқармаси бошлиқларининг асоссиз ҳаракатлари сабаб ноҳақ ишдан бўшатилган.
“Тошкент шаҳридаги учта туман ҳудудида йўл ҳаракати хавфсизлиги ходимларига масъул бўлганим боис, байрам кунлари уйимга ҳам боролмай қолган вақтларим бўлган. Шундай кунларнинг бирида қўл остимда ишловчи, мен яшайдиган ҳудудда истиқомат қилувчи ходимимга уйга қилган бозор-ўчаримни бериб юборганман. Бу ҳолатни бошқарма ходимлари расмга олиб, раҳбариятга нотўғри ахборот етказган. Шу воқеа сабаб менинг устимдан хизмат текшируви тайинланиб, ишдан бўшатилганман”, — дейди ички ишлар вазири қабулида бўлган собиқ ИИБ ходими.
Мурожаатчининг маълумот беришича, у Ички ишлар тизимида 20 йил давомида хизмат қилган.
“Бугун ички ишлар вазири қабулига келиб, адолат сўрадим. Бор воқеани вазирнинг шахсан ўзига айтиб, менинг устимдан чиқарилган ҳукм адолатсиз эканини, бу ҳолатни қайта кўриб чиқиб, адолатни тиклашлари лозимлигини сўрадим”, — дейди Ўктам Янгибоев.
Ички ишлар вазири Пўлат Бобожонов мазкур мурожаат шахсан ўзининг назоратида эканини айтиб, ҳолат қайта кўриб чиқилишини, адолатли қарор чиқарилишини билдирди.
Пўлат Бобожоновнинг бугунги қабулида, шунингдек, олий ўқув юртларида ўқиб контракт пулини тўлашга қийналган уч нафар ёшга 3 миллион сўмдан, икки нафарига 2 миллион сўмдан пул маблағлари тўлаб берилган.
“Уч нафар фуқарога ногиронлар аравачаси ҳамда аҳоли бандлигини таъминлаш мақсадида 21 нафар фуқарога субсидия асосида тикув машиналари топширилди.
Мурожаатларни кўриб чиқишда аҳолининг эҳтиёжлари ва талабларига таянган ҳолда узоқ вақтдан буён ечимини топмаётган муаммоларни ҳал этишга, жисмоний ва юридик шахсларнинг ҳуқуқларини амалда тикланишига алоҳида эътибор қаратилмоқда”, — дейди Қашқадарё вилоят ИИБ ахборот хизмати раҳбари Жавлон Бахтиев.
Изоҳ (0)