Turkmanistondagi atigi ikkita “Turkmanneft” konlari 2022-yilda atmosferaga Buyuk Britaniyadagidan ko‘proq karbonat angidrid gazini chiqargan. Bu haqda yangi sun’iy yo‘ldosh suratlari asosida The Guardian xabar berdi.
2022-yilda Turkmanistonning g‘arbiy qazilma konidan Kaspiy dengiziga 2,6 million tonna metan sizib chiqqan, sharqiy kondan esa 1,8 million tonna. Ikki kondan chiqarilgan jami chiqindi 366 million tonna karbonat angidridni tashkil etdi, bu dunyoda 17-o‘rinni egallagan Buyuk Britaniyaning yillik chiqindilaridan ko‘proqdir.
Mutaxassislar bu raqamlarni “hayratlanarli” deb ataydi va 2007-yildan beri Turkmanistondan chiqayotgan chiqindilar ortib borayotganini ta’kidlaydi. Bu tezlashuv global isishni 1,5 darajadan pastroq ushlab turishda katta tahdid hisoblanishi va “iqlimni halokatli burilish nuqtalari”ga olib kelishi mumkin.
So‘nggi paytlarda fakelda yoqilgan gaz o‘rniga ko‘zga ko‘rinmaydigan metan chiqindilari tobora ko‘payib bormoqda. Biroq zamonaviy texnologiyalar atrof-muhitning bunday ifloslanishini aniqlash imkonini beradi.
Yonmagan gaz chiqindilari olovga yoqishdan ko‘ra atmosferaga ko‘proq zarar yetkazadi. Metan karbonat angidriddan 80 baravar ko‘proq issiqlik iste’mol qiladi.
Mutaxassislar fikricha, muammoning yechimi konlardagi sizib chiqishlarni bartaraf etish bo‘lishi mumkin. Bu arzon va vaqt o‘tishi bilan o‘zini oqlaydi, chunki yig‘ilgan gazni sotish mumkin. Nashrning qayd etishicha, Turkmaniston neft va gaz sanoati infratuzilmasi “juda yomon” ahvolda.
Izoh (0)