Toshkent viloyati Sog‘liqni saqlash boshqarmasiga yangi rahbar tayinlandi

Toshkent viloyati hokimligida viloyat Sog‘liqni saqlash boshqarmasiga rahbarlik qilib kelayotgan To‘raqul Arziqulov boshqa ishga o‘tishi munosabati bilan kuzatish marosimi o‘tkazilgan. Va uning o‘rnida boshqa rahbar ish boshlagan. Bu haqda “Daryo”ga viloyat hokimligi axborot xizmati xabar berdi.

Tadbirda viloyat hokimi Zoir Mirzayev boshchiligida sektor rahbarlari, shahar va tuman hokimlari, tibbiyot birlashmasining masʼullari qatnashgan.

“Viloyat hokimi Zoir Mirzayev To‘raqul Arziqulovning viloyatda sog‘liqni saqlash sohasini rivojlantirishga qo‘shgan hissasini alohida qayd etdi hamda kelgusi faoliyatiga omad va zafarlar tiladi. Marosimda so‘zga chiqqanlar professor, tibbiyot fanlari doktori To‘raqul Arziqulovning rahbarlik va ilmiy-amaliy faoliyatidagi ibratli jihatlarni alohida eʼtirof qildi”, — deydi viloyat hokimligi axborot xizmati rahbari Behzod Qobulov.

Qo‘shimcha qilinishicha, boshqarmaga 1984-yilda tug‘ilgan va ayni kunga qadar Vazirlar Mahkamasida Taʼlim, sog‘liqni saqlash va sport masalalari kotibiyati, Sog‘liqni saqlash va sport sohasidagi islohotlarni muvofiqlashtirish sho‘basi bosh mutaxassisi vazifasida ishlab kelgan Ulug‘bek Abdug‘aniyev tayinlangan.

Ulug‘bek Abdug‘aniyev Toshkent viloyatining Bekobod tumanida tug‘ilgan bo‘lib, 2008-yilda Toshkent tibbiyot akademiyasini, 2010-yilda Respublika shoshilinch tibbiy yordam ilmiy markazi klinik ordinaturasini tamomlagan.