UzAuto Motors 2021 йилда бир қанча истеъмолчилар билан Captiva 5 автомобилини етказиб бериш бўйича шартномалар тузган. Лекин маълум муддат ўтганидан кейин мазкур русумдаги автомобилларни сотиш тўхтатилган. Сабаб сифатида Captiva 5 нинг Ўзбекистон иқлимига тўғри келмаслиги айтилган. UzAuto Motors’нинг бу даъвосидан норози бўлган истеъмолчи Ўктам Қаҳҳоров қонуний ҳақ-ҳуқуқлари талабида судга мурожаат қилган.
Ўктам Қаҳҳоров 2021 йил октябрда Chevrolet Captiva 5 учун пул тўлаб, автомобилини шу пайтгача ололмай, UzAuto Motors ва унинг дилерлик марказидан суд орқали шартнома шартига кўра машинани етказиб беришни талаб қилиб келмоқда. Бу масалада бир неча марта суд жараёнлари бўлиб ўтган. UzAuto Motors судда ютқазган. Аммо жараён яна чўзилиб, ҳозиргача давом этаётганди.
Собиқ депутат, Табиат ресурслари вазири масалаҳатчиси Расул Кушербаев Telegram’даги каналида хабар беришича, Олий суд якуний суд мажлисида ҳам Қаҳҳоров фойдасига қарор чиқариб, компанияга Captiva 5 ни истеъмолчига етказиб бериш мажбуриятини юклади.
“Суд қарори бўйича ижро ҳаракатлари бошланганда UzAuto Motors’чилар ижрони тўхтатиб, Олий суд раисига такрорий кассация келтиришни сўраб ариза киритганди. Олий суд раиси бу ишни қайта кўриб чиқишга асос йўқ, деб аризани қайтарган. Бироқ, кутилмаганда мазкур масала бўйича бош прокурор ўринбосари С.Артикова Олий судга такрорий кассация тартибида кўриб чиқиш UzAuto Motors’нинг ёнини олиб, протест келтирганди. Истеъмолчи эмас, монополистнинг ёнини олиб протест киритган бош прокурор ўринбосарининг бу ҳаракати очиғи мени ҳам хафа қилган.
Ва ниҳоят, бугун такрорий кассация тартибида С.Артикованинг протестини кўриб чиққан Олий суд судлов ҳайъати протестни рад қилиш ҳақида қарор қабул қилди. Шу тариқа монополист компания учун бахона қиладиган, осиладиган бошқа жой ҳам, тешик ҳам қолмади. Компания қандай бўлмасин суд қарорини ижро этиб, истеъмолчига ваъда қилинган Captiva 5 автомбилини етказиб бериши керак вассалом. Суд қарорларини ижро қилиш барча, шу жумладан, UzAuto Motors учун ҳам мажбурий”, — деб ёзади вазир маслаҳатчиси.
“Биз фақат бир нарсани, яъни монополистга келганда ҳам қонунлар ишлашини, суд қарори ижро қилинишини истаймиз холос. Фуқаро фойдасига келганда ҳам қонунлар ишласин”, — дея қўшимча қилади собиқ депутат.
“Буёғига энди қонунларнинг ишлашини кутамиз. Истеъмолчилар фойдасига чиққан қарорлар камдан кам бўлади”, — дейди Ўктам Қаҳҳоров.
Эслатиб ўтамиз, UzAuto Motors Chevrolet Captiva 5 автомобилларини етказиб бериш бўйича шартномалар тузишни 2021 йил 20 ноябрда тўхтатган. Бунга сабаб сифатида жаҳон бозорида яримўтказгич микрочиплар етишмаётгани келтирилган.
Изоҳ (0)