O‘zbekistonda muzey va ziyoratgohlarga kirish 18 yoshga to‘lmaganlar uchun bepul bo‘ladi

O‘zbekistonda 1-sentabrdan boshlab 18 yoshgacha bo‘lgan bolalar uchun muzey va ziyoratgohlarga kirish bepul bo‘ladi.

“Yangi tahrirdagi O‘zbekiston Respublikasi Konstitutsiyasini amalga oshirish bo‘yicha birinchi navbatdagi chora-tadbirlar to‘g‘risida”gi prezident farmoniga ko‘ra, bunday imkoniyat bolalar va yoshlarda xalqning boy madaniy merosidan faxrlanish, Vatanga bo‘lgan mehr-muhabbat tuyg‘ularini shakllantirishga oid qoidalarni amalga oshirish maqsadida joriy etilmoqda.

Respublika fuqarosi hisoblangan va 18 yoshgacha bo‘lgan bolalar madaniy meros obyektlariga, jumladan, ko‘rgazmalar, tarixiy obidalar va ziyoratgohlar, shuningdek, davlat muzeylariga to‘lovsiz kirishi mumkin bo‘ladi.

“Muzeylarda xizmatlar sohasini rivojlantirish chora-tadbirlari to‘g‘risida”gi prezident qaroriga ko‘ra, “temir daftar”, “ayollar daftari” va “yoshlar daftari”ga kiritilgan fuqarolar va nogironligi bo‘lgan shaxslarga davlat muzeylariga bepul kirish huquqi berilgandi.