Rossiya prezidenti Vladimir Putin Ukrainaga nisbatan ambitsiyalarini mo‘tadil qildi. U Ukrainani butunlay egallash ish bermasligini tushundi. Bu haqda AQSH Milliy razvedkasi rahbari Avril Xeyns ma’lum qildi.
Uning so‘zlariga ko‘ra, Kreml rahbari bor e’tiborni Ukrainaning allaqachon bosib olingan hududlari ustidan nazoratni kuchaytirishga, shuningdek, mamlakat NATOga a’zo bo‘lmasligini ta’minlashga qaratmoqchi. Bu yil konstruktiv muzokaralar boshlanishi dargumon.
AQSH razvedka rahbari rus qo‘shinlari Ukraina qurolli kuchlarining qarshi hujumini kutib, istehkomlarni tayyorlayotganini aytdi. Xeyns Rossiya 2023-yilda o‘q-dorilar va ishchi kuchi yetishmasligi sababli muhim hujum operatsiyasini o‘tkaza olmasligini qo‘shimcha qildi.
“Darhaqiqat, agar Rossiya majburiy safarbarlikni boshlamasa va Erondan olib kelinayotgan mavjud ta’minotga qo‘shimcha ravishda uchinchi tomon o‘q-dorilarini sezilarli darajada ta’minlamasa, hatto oddiy hujum operatsiyalarini ham qo‘llab-quvvatlash tobora qiyinlashadi”, — dedi razvedka rahbari.
Xeyns Rossiya, katta ehtimol bilan, Ukrainaga qarshi yadro qurolidan foydalanmasligini ham ta’kidladi. U Ukrainaga qarshi urushda Rossiya og‘ir yo‘qotishlarga uchraganiga qaramay, Moskvani vazminlik ko‘rsatishga chaqirgan.
Izoh (0)