“AQSHdagi 3 ta bankning bankrot bo‘lgani rivojlanayotgan davlatlarga sezilarli taʼsir qiladi” — Mamarizo Nurmurodov

AQSH va Shveysariyada bankrot bo‘lgan banklar xalqaro moliya bozorlarida kredit resurslariga talabning qimmatlashishiga olib keladi. Bu haqda O‘zbekiston Markaziy banki raisi Mamarizo Nurmurodov 4-may kuni tashkil etilgan matbuot anjumanida aytib o‘tdi, deya xabar berdi “Daryo” muxbiri.

Mamarizo Nurmurodovning aytishicha, yirik banklarning yopilishi ayniqsa rivojlanayotgan davlatlarga sezilarli taʼsir qilishi mumkin.

“Bizning bank tizimi ham xalqaro moliya bozoriga kirgan. Albatta, AQSHda 3 ta, Shveysariyada 1 ta bankning bankrotga uchrashi xalqaro moliya bozorlarida kredit resurslariga bo‘lgan talabning qimmatlashishiga olib keladi. Buning oqibatida xorijiy hamkorlar rivojlanayotgan davlatlarga ehtiyotkorlik bilan resurs ajrata boshlaydi. Keyingi xavotir shundaki, bizdagi kuchli banklarning xalqaro banklar bilan hisob-kitob munosabatlari bor. Ammo bankrot bo‘lgan banklar bilan bizning banklar hech qanday aloqalarga ega emas. Biz bu jarayon bilan doimiy shug‘ullanamiz. Yirik banklarning bankrotlikka olib kelgan holatlar bo‘yicha doimiy ravishda monitoring o‘tkazib boramiz”, — dedi Markaziy bank raisi.

Eslatib o‘tamiz, mart oyida AQSHdagi yirik banklardan biri Silicon Valley Bank bankrot bo‘lgandi. Shuningdek, Signature Bank yopilgani, First Republic Bank moliyaviy muammolarga duch kelgani xabar qilingan.