“АҚШдаги 3 та банкнинг банкрот бўлгани ривожланаётган давлатларга сезиларли таъсир қилади” — Мамаризо Нурмуродов

АҚШ ва Швейцарияда банкрот бўлган банклар халқаро молия бозорларида кредит ресурсларига талабнинг қимматлашишига олиб келади. Бу ҳақда Ўзбекистон Марказий банки раиси Мамаризо Нурмуродов 4 май куни ташкил этилган матбуот анжуманида айтиб ўтди, дея хабар берди “Дарё” мухбири.

Мамаризо Нурмуродовнинг айтишича, йирик банкларнинг ёпилиши айниқса ривожланаётган давлатларга сезиларли таъсир қилиши мумкин.

“Бизнинг банк тизими ҳам халқаро молия бозорига кирган. Албатта, АҚШда 3 та, Швейцарияда 1 та банкнинг банкротга учраши халқаро молия бозорларида кредит ресурсларига бўлган талабнинг қимматлашишига олиб келади. Бунинг оқибатида хорижий ҳамкорлар ривожланаётган давлатларга эҳтиёткорлик билан ресурс ажрата бошлайди. Кейинги хавотир шундаки, биздаги кучли банкларнинг халқаро банклар билан ҳисоб-китоб муносабатлари бор. Аммо банкрот бўлган банклар билан бизнинг банклар ҳеч қандай алоқаларга эга эмас. Биз бу жараён билан доимий шуғулланамиз. Йирик банкларнинг банкротликка олиб келган ҳолатлар бўйича доимий равишда мониторинг ўтказиб борамиз”, — деди Марказий банк раиси.

Эслатиб ўтамиз, март ойида АҚШдаги йирик банклардан бири Silicon Valley Bank банкрот бўлганди. Шунингдек, Signature Bank ёпилгани, First Republic Bank молиявий муаммоларга дуч келгани хабар қилинган.