Япониядаги олтин нархи инвесторларнинг ушбу активга қизиқиши ортиб бораётгани фонида ўзининг тарихий энг юқори кўрсаткичини янгилади. Бу ҳақда трейдерлар ва савдо маълумотларига таяниб “ТАСС” хабар бермоқда.
Мамлакатдаги энг йирик қимматбаҳо металлар ишлаб чиқарувчи ва сотувчи компанияларидан бири Танака Кикинзоку 1 грамм олтиннинг чакана нархини 9 680 иен (70,45 доллар) қилиб белгилади. Бу Япония учун тарихдаги энг юқори нарх.
Токио товар биржасида сешанба, 2 май куни олтин фючерслари нархи тахминан 8 756 иенни (63,71 доллар) ташкил этмоқда.
Шу билан бирга, Токио фонд биржасидаги савдолар иенанинг долларга нисбатан қадрсизланиши давом этаётгани фонида юқори индексларда бўлмоқда, бу эса япон экспорт ишлаб чиқарувчилари учун фойдалидир.
Олтин нега кўтарилмоқда?
АҚШ ва Европадаги банк инқирози молиявий активларга бўлган талабни пасайтириб, қимматбаҳо металларга бўлган талабни оширди.
Содда қилиб айтганда, бунгача пулларини банкка омонатга қўйган инсонлар банк инқирози сабаб омонатларини қайтариб олиб, қимматбаҳо металлар, хусусан олтинни харид қилишмоқда. Бу эса олтинга бўлган талабни кўпайтириб, нархлар ошишига олиб келади.
2 май ҳолатига кўра глобал олтин нархлари бир троя унсияси учун 1 980 доллар атрофида шаклланмоқда.
Изоҳ (0)