Холчаёндан топилган шаҳзода ҳайкали, Далварзинтепадан топилган олтин хазиналари. Эрамиздан аввалги IV асрдан эрамизнинг IV асригача бўлган археологик хазиналар Берлиндаги музейда намойиш этилади 

Ўзбекистон Маданият ва санъатни ривожлантириш жамғармаси томонидан “Ўзбекистоннинг археологик хазиналари. Македониялик Искандардан то Кушонлар сулоласигача” номли янги кўргазма лойиҳаси тақдим этилмоқда.

Ушбу кўргазма 2023 йилнинг 4 майидан 2024 йилнинг 14 январига қадар бўлиб ўтади.

Археологик топилмаларга бағишланган ва эрамиздан аввалги IV асрнинг иккинчи ярмида македониялик Искандар ҳукмронлигидан то милодий IV асрдаги Кушонлар ҳукмронлигининг охиригача бўлган даврни қамраб олувчи кўргазма икки масканда – Берлиндаги Жеймс Симон галереяси ва Янги музейида ташкил этилади. 

Маданият ва санъатни ривожлантириш жамғармасида лойиҳалар менежери Азизбек Манноповнинг сўзларига кўра, ушбу кўргазма Александр Македонскийдан бошлаб Кушонларгача бўлган даврни ўз ичига олади.

“Ташриф буюрувчилар Ўзбекистоннинг Самарқанд, Бухоро, Тошкент, Термиз шаҳарлари ва Қорақалпоғистоннинг Нукус шаҳри музейларидан келтирилган 284 та экспонатни бевосита томоша қилишлари мумкин бўлади. Жараёнга 1 йилдан ортиқ муддат тайёргарлик кўрдик. Таъкидлаш керакки, бундай йирик халқаро тадбирларнинг ташкилий жараёнлари ўзига хос мураккабликдаги аниқликни талаб этади. Музейга олиб келинган экспонатларимизнинг барчаси “Наил-то-Наил” дастури бўйича  суғурталанган. Яъни музейдан чиқиб то қайтиб боргунича суғурта ишлайди”, — дейди мутахассис.

Маданият ва санъатни ривожлантириш жамғармаси маданий ҳамкорлик бошқармаси бошлиғи Бобур Саёмовнинг таъкидлашича, Франциянинг Лувр музейидаги кўргазма эрамизнинг IV асрдан эрамизнинг XVI асригача бўлган каттароқ даврни ўз ичига олган эди. 

“Бу ерда эса эрамиздан аввалги IV асрдан эрамизнинг IV асригача бўлган давр чуқурроқ очиб берилади. Асосий урғу Александр Македонский ҳамда Кушонлар давридаги археологик, маданий топилмаларга берилади. 

Кўргазмадаги ҳар бир экспонат биз учун қимматли. Уларнинг орасида Холчаёндан топилган шаҳзода ҳайкали, Далварзинтепадан топилган олтин хазиналари оммага илк бор намойиш этилаётган жуда кўплаб нодир музей ашёлари мавжуд”, — дейди у.

Берлин давлат музейлари илмий лойиҳалари бўйича мутахассис Манфред Навротнинг айтишича, кўргазмага борасидаги музокаралар 2018 йил охирида, Берлинда тарихий буюмларни йиғиш вақтда бошланган.

“Кўргазманинг ўзига хослигидан жуда фахрланамиз. Ўзбекситон томонидан 300 га яқин буюмлар тақдим этилди. Бу нарсаларни биз бирнинчи марта кўрмоқдамиз, негаки неча йиллар мобайнида мамлакат Германия учун, бутун Европа учун ёпиқ эди”, — дея қўшимча қилади Манфред Наврот.