Boks bo‘yicha -48 kg vazn toifasida ikki karra Osiyo chempioni Nodirjon Mirzaahmedov “Daryo” bilan bo‘lgan suhbatda ketma-ket ikkinchi marta xalqaro musobaqa uchun O‘zbekiston terma jamoasi safidan o‘rin ololmagani haqida gapirdi.
Mirzaahmedovning qayd etishicha, O‘zbekistonda o‘tadigan JCH—2023 dan oldin 2022-yilgi Osiyo chempionatida ham tarkibdan tushib qolgan.
“Iordaniyada o‘tgan 2022-yilgi Osiyo chempionatidan 2 oycha avval tarkibni boshqatdan ko‘rib chiqamiz deyishdi. Kubadan uch nafar murabbiy keldi. Andijonda o‘tadigan “Zolotaryov” turnirida yutganlarni Osiyo chempionatiga saralab olamiz deyishdi. Ushbu musobaqada -48 kg vazn toifasida chempion bo‘ldim.
Tayyorgarlikning so‘nggi bosqichi Toshkentda o‘tdi. Osiyo chempionatiga borishimga ishonchim komil edi, biroq u vaqtda hali tarkib e’lon qilinmagandi. 4–5 kundan keyin bosh murabbiy To‘lqin Qilichev buxorolik bokschi Asilbek Jalilov bilan sparring tushishim kerakligini aytdi.
Nimaga sparringda qatnashaman, musobaqani yutdim-ku, dedim. Yana bir marta isbotlagin deyishdi. Men esa isbotlaydiganimni isbotlab bo‘lganimni aytdim. O‘sha vaqtda ikki karra Osiyo chempioni edim, men emas, yosh sportchilar isbotlashi kerak. Jalilov ham “Zolotaryov” musobaqasida tushdi, yutqazib qo‘ydi.
Bunga qanday chidash kerak, bilmadim. Osiyo chempionatiga ikki kun qolganda sparring bo‘ldi. Jalilov bilan sparring o‘tkazdim, unda yutdim. Federatsiyaning anjumanlar zalida yig‘ilish bo‘ldi. Tarkib o‘qildi, men yo‘qman. Bu haqiqatni lekin barcha tan olgan.
E’tirozlar bormi degan savol yangradi. O‘sha yerda baqirib tashlashim mumkin edi, chunki nohaqlik bo‘lyapti. Indamadim, ichimda yig‘lab chiqib ketdim. Majlisdan keyin rahbar bilan alohida xonada gaplashib oldim. Nima sababdan qoldirib ketishayotganini so‘radim. Yoshlarga imkoniyat berish kerakligi haqida aytdi.
Jahon chempionatida nima bo‘ladi deb so‘radim. Jahon chempionatida bunday bo‘lmaydi, kim kuchli bo‘lsa o‘sha tushadi degan javobni oldim. Rahbarlar shuni xohlayapti ekan, bunga rozi bo‘ldim. Ularga omad tilab, chiqib ketdim. O‘rnimga ketgan bola Osiyo chempionatida birinchi jangdayoq yutqazib, chiqib ketdi”, — deya eslaydi Nodirjon.
Bokschi Jahon chempionatida ham xuddi shunday holat takrorlanganini qayd etib o‘tdi.
“Yutqazganim uchun tashlab ketishsa ham mayli edi. Yutyapman, yana tashlab ketishyapti. Jahon chempionatida ham xuddi shunaqa bo‘ldi. Undan ko‘ra ‘Nodir, bo‘ldi boksni yig‘ishtir. Seni olib ketmaymiz’, deyishsa shuncha asabbuzarlik bo‘lmasdi”, — deydi sportchi.
To‘liq videoni quyida tomoshi qilish mumkin:
Mirzaahmedov boks bo‘yicha 2019 va 2021-yilgi Osiyo chempionati g‘olibi hisoblanadi.
Izoh (0)