“Осиё чемпионатида ҳам худди шундай бўлганди”. Боксчи Нодиржон Мирзааҳмедов қаторасига иккита халқаро турнирдан ноҳақ чиқариб юборилгани ҳақида (видео)

Бокс бўйича -48 кг вазн тоифасида икки карра Осиё чемпиони Нодиржон Мирзааҳмедов “Дарё” билан бўлган суҳбатда кетма-кет иккинчи марта халқаро мусобақа учун Ўзбекистон терма жамоаси сафидан ўрин ололмагани ҳақида гапирди.

Мирзааҳмедовнинг қайд этишича, Ўзбекистонда ўтадиган ЖЧ—2023 дан олдин 2022 йилги Осиё чемпионатида ҳам таркибдан тушиб қолган.

“Иорданияда ўтган 2022 йилги Осиё чемпионатидан 2 ойча аввал таркибни бошқатдан кўриб чиқамиз дейишди. Кубадан уч нафар мураббий келди. Андижонда ўтадиган “Золотарёв” турнирида ютганларни Осиё чемпионатига саралаб оламиз дейишди. Ушбу мусобақада -48 кг вазн тоифасида чемпион бўлдим.

Тайёргарликнинг сўнгги босқичи Тошкентда ўтди. Осиё чемпионатига боришимга ишончим комил эди, бироқ у вақтда ҳали таркиб эълон қилинмаганди. 4–5 кундан кейин бош мураббий Тўлқин Қиличев бухоролик боксчи Асилбек Жалилов билан спарринг тушишим кераклигини айтди.

Нимага спаррингда қатнашаман, мусобақани ютдим-ку, дедим. Яна бир марта исботлагин дейишди. Мен эса исботлайдиганимни исботлаб бўлганимни айтдим. Ўша вақтда икки карра Осиё чемпиони эдим, мен эмас, ёш спортчилар исботлаши керак. Жалилов ҳам “Золотарёв” мусобақасида тушди, ютқазиб қўйди.

Бунга қандай чидаш керак, билмадим. Осиё чемпионатига икки кун қолганда спарринг бўлди. Жалилов билан спарринг ўтказдим, унда ютдим. Федерациянинг анжуманлар залида йиғилиш бўлди. Таркиб ўқилди, мен йўқман. Бу ҳақиқатни лекин барча тан олган.

Эътирозлар борми деган савол янгради. Ўша ерда бақириб ташлашим мумкин эди, чунки ноҳақлик бўляпти. Индамадим, ичимда йиғлаб чиқиб кетдим. Мажлисдан кейин раҳбар билан алоҳида хонада гаплашиб олдим. Нима сабабдан қолдириб кетишаётганини сўрадим. Ёшларга имконият бериш кераклиги ҳақида айтди.

Жаҳон чемпионатида нима бўлади деб сўрадим. Жаҳон чемпионатида бундай бўлмайди, ким кучли бўлса ўша тушади деган жавобни олдим. Раҳбарлар шуни хоҳлаяпти экан, бунга рози бўлдим. Уларга омад тилаб, чиқиб кетдим. Ўрнимга кетган бола Осиё чемпионатида биринчи жангдаёқ ютқазиб, чиқиб кетди”, — дея эслайди Нодиржон.

Боксчи Жаҳон чемпионатида ҳам худди шундай ҳолат такрорланганини қайд этиб ўтди.

“Ютқазганим учун ташлаб кетишса ҳам майли эди. Ютяпман, яна ташлаб кетишяпти. Жаҳон чемпионатида ҳам худди шунақа бўлди. Ундан кўра ъНодир, бўлди боксни йиғиштир. Сени олиб кетмаймизъ, дейишса шунча асаббузарлик бўлмасди”, — дейди спортчи.

Тўлиқ видеони қуйида томоши қилиш мумкин:

Мирзааҳмедов бокс бўйича 2019 ва 2021 йилги Осиё чемпионати ғолиби ҳисобланади.