Сирдарё вилоятида 500 миллион долларлик Ўзбекистон–Хитой биотехнологиялар кластери қурилади. Бу ҳақда вилоят ҳокимлиги ахборот хизмати хабар берди.
Хабарга кўра, бу нафақат Марказий Осиё, балки МДҲ ва Кавказолди давлатлари учун ягона бўлиб хизмат қилади. Хитой биотехнология соҳаси ривожи бўйича сўнгги беш йилда АҚШдан кейин дунёда иккинчи ўринда.
Кластер соҳага миллий кадрлар тайёрлаш ва илмий тадқиқот билан шуғулланишга мўлжалланган Ўзбек-Сино биотехнология университети (Uzbek-Sino Biotechnology University), касалликларни даволашда энг сўнгги диагностика даволаш усуллари қўлланадиган Инновацион тиббиёт клиникаси, Марказий Осиё аҳолиси, ҳудуддаги ҳайвонлар ва ўсимликлар геномини ўрганишга ихтисослашган Марказий Осиё геном маркази, биоматериаллар ва генетик маълумотларни сақловчи Генбанк ва дата маркази, ўсимта ва саратон касалликларини даволовчи Ҳужайра терапияси марказини ўз ичига олади.
Бундан ташқари, ҳудудда лабораториялар учун диагностика ускуналари ва махсус тўпламларини ишлаб чиқарувчи корхона, инновацион вакциналар ишлаб чиқарувчи марказ барпо этилади. Алоҳида корхоналарда пробиотик биопрепаратлар, моноклонал антитаначалар ва бошқа рекомбинант препаратлар ишлаб чиқарилади. Янги туғилган чақалоқлар ва ҳомиладор аёллардаги генетик муаммоларни аниқлаш учун диагностика маркази ташкил этилади. Шунингдек, 10 минг талаба учун ўқув бинолари, замонавий кампус, лабораториялар, муҳандислар мактаби очилади.
Изоҳ (0)