Andijon viloyatining Qo‘rg‘ontepa tumani tarkibidagi Qorasuv shahri viloyatga bo‘ysunuvchi hudud sifatida qayta tashkil etiladi. Bu haqda “Daryo” manbasi xabar bermoqda.
Taʼkidlanishicha, 28-aprel kuni Xalq deputatlari viloyat kengashining “Qo‘rg‘ontepa tumanidagi 10 ta mahalla fuqarolar yig‘inlari hududlarini yangi tashkil etilayotgan ‘Qorasuv shahar’ tarkibiga o‘tkazish haqida” qarori qabul qilingan.
Qarorga ko‘ra, tumanning “Mustaqillikning 15 yilligi”, “Mustaqillik”, “Zahiriddin Muhammad Bobur”, “Ahmad Yassaviy”, “Yuksalish”, “Mirzo Ulug‘bek”, “Amir Temur”, “Paxtachi”, “Uch tegirmon” va “Birlik” mahalla fuqarolar yig‘inlarining iltimosnomalari inobatga olinishi belgilangan. Shuningdek, viloyat hokimiga “O‘zbekiston
Respublikasining maʼmuriy-hududiy tuzilishi to‘g‘risida”gi qonuniga muvofiq mazkur mahalla fuqarolar yig‘inlarini yangi tashkil etilayotgan “Qorasuv shahar” tarkibiga o‘tkazish bo‘yicha taklifini ko‘rib chiqish va Oliy Majlisga kiritish masalasi yuzasidan O‘zbekiston Respublikasi Vazirlar Mahkamasiga iltimosnoma kiritish vazifasi yuklatilgan.
“Daryo”ning tuman hokimligidagi manbasining taʼkidlashicha, Qorasuv shahri aholisi hamda ishlab chiqarish obyektlarining ortishi shunday o‘zgarishga sabab bo‘lgan. Shuningdek, aholining bir necha yillik takliflari ham inobatga olingan. Shaharni alohida maʼmuriy birlik sifatida tashkil etish ishlari 2022-yilning noyabr oyida boshlangan.
Maʼlumot uchun, Qorasuv shahri 1980-yilda tashkil etilgan. 1998-yildan 2004-yilga qadar viloyatga bo‘ysunuvchi shahar hisoblangan. 2004-yilda Qo‘rg‘ontepa tumaniga bo‘ysunuvchi shahar sifatida qo‘shib yuborilgan.
Izoh (0)