O‘zbekiston bilan diplomatik aloqa o‘rnatgan davlatlar 143 taga yetdi

Syerra-Leone Respublikasi O‘zbekiston bilan diplomatik munosabatlar o‘rnatgan 143-davlatga aylandi. Bu haqda “Dunyo” agentligi xabar berdi.

Qayd etilishicha, 28-aprel kuni Nyu-Yorkda O‘zbekiston bilan Syerra-Leone o‘rtasida diplomatik munosabatlar o‘rnatish to‘g‘risida Qo‘shma kommunike imzolandi. Ikki davlat hukumati nomidan hujjatni O‘zbekistonning BMTdagi doimiy vakili Baxtiyor Ibragimov va Syerra-Leonening BMTdagi doimiy vakili Alxadji Fand Turay imzolagan.

Ushbu davlat G‘arbiy Afrikada Atlantika okeani sohilida joylashgan, Britaniya Hamdo‘stligi, IHT, Qo‘shilmaslik harakati va boshqa xalqaro tashkilotlar aʼzosi.

Tomonlar xalqaro tashkilotlar, jumladan, BMT va uning ixtisoslashgan muassasalari doirasida qo‘shma hamkorlikni mustahkamlashdan manfaatdor ekanini tasdiqlagan. Hamkorlikning o‘zaro manfaatli yo‘nalishlarini izlash uchun ikki tomonlama aloqalarni davom ettirish bo‘yicha kelishuvga erishilgan.

So‘nggi yillardagi diplomatik munosabatlar

2021-yilning mayida Dominika O‘zbekiston diplomatik aloqalar o‘rnatgan 137-, Panama 138-davlat bo‘lgandi. 2022-yil 9-mart kuni mamlakatimiz Sent-Kits va Nevis Federatsiyasi bilan diplomatik aloqalar o‘rnatgan edi. 10-may kuni Sent-Vinsent va Grenadin orollari O‘zbekiston bilan diplomatik munosabatlar o‘rnatgan 140-mamlakat bo‘lgandi.

2022-yil iyunda esa Antigua va Barbuda bilan diplomatik munosabatlar o‘rnatilgan. O‘sha yilning noyabrida Gayana Kooperativ Respublikasi O‘zbekiston bilan diplomatik munosabatlar o‘rnatgan 142-davlat bo‘lgandi.