Андижон вилоятининг Қўрғонтепа тумани таркибидаги Қорасув шаҳри вилоятга бўйсунувчи ҳудуд сифатида қайта ташкил этилади. Бу ҳақда “Дарё” манбаси хабар бермоқда.
Таъкидланишича, 28 апрель куни Халқ депутатлари вилоят кенгашининг “Қўрғонтепа туманидаги 10 та маҳалла фуқаролар йиғинлари ҳудудларини янги ташкил этилаётган ‘Қорасув шаҳар’ таркибига ўтказиш ҳақида” қарори қабул қилинган.
Қарорга кўра, туманнинг “Мустақилликнинг 15 йиллиги”, “Мустақиллик”, “Заҳириддин Муҳаммад Бобур”, “Аҳмад Яссавий”, “Юксалиш”, “Мирзо Улуғбек”, “Амир Темур”, “Пахтачи”, “Уч тегирмон” ва “Бирлик” маҳалла фуқаролар йиғинларининг илтимосномалари инобатга олиниши белгиланган. Шунингдек, вилоят ҳокимига “Ўзбекистон
Республикасининг маъмурий-ҳудудий тузилиши тўғрисида”ги қонунига мувофиқ мазкур маҳалла фуқаролар йиғинларини янги ташкил этилаётган “Қорасув шаҳар” таркибига ўтказиш бўйича таклифини кўриб чиқиш ва Олий Мажлисга киритиш масаласи юзасидан Ўзбекистон Республикаси Вазирлар Маҳкамасига илтимоснома киритиш вазифаси юклатилган.
“Дарё”нинг туман ҳокимлигидаги манбасининг таъкидлашича, Қорасув шаҳри аҳолиси ҳамда ишлаб чиқариш объектларининг ортиши шундай ўзгаришга сабаб бўлган. Шунингдек, аҳолининг бир неча йиллик таклифлари ҳам инобатга олинган. Шаҳарни алоҳида маъмурий бирлик сифатида ташкил этиш ишлари 2022 йилнинг ноябрь ойида бошланган.
Маълумот учун, Қорасув шаҳри 1980 йилда ташкил этилган. 1998 йилдан 2004 йилга қадар вилоятга бўйсунувчи шаҳар ҳисобланган. 2004 йилда Қўрғонтепа туманига бўйсунувчи шаҳар сифатида қўшиб юборилган.
Изоҳ (0)