Иқтисодиёт ва молия вазири ўринбосари Анвар Каримов “Дарё” журналистининг “Очиқ бюджет”да овоз бериш жараёнини шаффофлаштириш таклифини илгари суриб, “овоз беришда овоз берувчининг ҳудудни яхши билиш-билмаслиги ҳам инобатга олиниши керак, масалан Тошкент шаҳрининг Юнусобод ёки Чилонзор туманида яшовчи аҳоли маълум бир ҳақ эвазига Қашқадарё вилоятининг Миришкор туманидаги қайсидир маҳалла йўлини таъмирлаш учун овоз бериши қай даражада адолатли? Овоз йиғаётганлар кўрсатган 2 дона расм овоз берувчига ҳудуддаги аҳвол ҳақида тўлиқ тасаввурга эга бўлиши етарли эмас-ку”, дея берган саволига “Шахсан мен аслида сирдарёликман, бугунги кунда Тошкент шаҳрида яшаётган бўлсам-да, туғилиб ўсган қишлоғим учун овоз беришим мумкин-ку, буни чекламанг”, — дея жавоб берди.
Маълум бўлишича, 28 апрель куни Иқтисодиёт ва молия вазирлигида “Очиқ бюджет” ахборот портали орқали эълон қилинган “Ташаббусли бюджет” лойиҳасининг 2023 йил биринчи мавсумида фаол иштирок этган ҳоким ёрдамчилари ва фуқароларни тақдирлаш маросими бўлиб ўтган.
Тадбирда сўз олган “Дарё” журналисти “Ташаббусли бюджет” ташаббускорларига юзланиб, “Очиқ бюджет” лойиҳасида овоз бериш жараёнини шаффофлаштириш кераклигини айтиб, “овоз бериш жараёнида овоз берувчининг овоз бераётган лойиҳасини қай даражада билиш-билмаслиги, ҳудуддаги вазиятни тасаввур қила олиш имконияти ҳам ҳисобга олиниши керак. Масалан Қашқадарё вилоятининг Миришкор туманида яшовчи овоз йиғувчи Тошкент шаҳрига келиб одамлардан овоз тўплаётганда Юнусобод ёки Чилонзор туманида яшовчи одамга 2 дона расм кўрсатиб, маҳалласидаги йўлнинг абгорлигини айтади ва маълум ҳақ эвазига овоз беришга чорлайди. Айтайлик овоз йиғувчи уддабуронлиги, имконияти борлиги сабаб шу маҳалла йўли бошқа бир маҳалла йўлига нисбатан яхши бўлса-да, Тошкентга келиб ҳудудни билмайдиган одамдан ўша ҳудуд таъмирланишини сўраб, юқорига таклиф оляпти. Ҳолбуки, Тошкентда яшаган, Қашқадарёга бориб кўрмаган овоз берувчи ҳудуд ҳақида ҳатто тасаввурга ҳам эга эмас. Шунингдек, овоз тўпловчи кўрсатган 2 дона расм ҳудуд аҳволи ҳақида етарлича тасаввур олишга имкон бермайди. Ташаббускорлар мана шунақа вазиятда шаффофликни таъминлаш учун нимадир қиляптими?”, — дея савол берди.
Мазкур саволга жавоб берган вазир ўринбосари савол моҳиятини унча тушунмади чоғи “Мен асли сирдарёликман, Тошкентда яшасам ҳам туғилиб-ўсган қишлоғим учун овоз бериш имкониятимни чекламанг”, — дея жавоб берди. Ваҳоланки, нашр журналистининг саволида овоз бераётган кишининг овоз бераётган ҳудудини билиш-билмаслиги, ўша ҳудуд ҳақида тасаввурга эга бўлиш имконияти ҳисобга олиниши керак дейилган. Вазир ўринбосарининг журналист саволига жавоби қониқарсиз бўлди.
Изоҳ (2)
Аниқ асослантирилган таклиф билан чиқингизлар унда, сизлар халқни ичидасизларку, бошқа давлатлардаям фаолият юритишни бошладингизлар, аниқ журналистик суриштирув ўтказиб, фактлар билан муаммони кўтариб, асослантирилган таклиф билан чиқинглар, билдирилаётган фикр ва бераётган таклифларингиз асосли бўлса халқ ҳам давлат ҳам қўллаб қувватлайди
Нима фарқи бор сизларга, Қашқадарёдан келиб овоз йиғадими Сирдарёданми, маҳалласи учун, кўчаси учун курашяпти, сизлар ОАВ сизларку, бориб, жойга чиқиб таъминланглар шаффофликни унда, ўтирволиб танқид қилишни ўрнига