Rossiya mudofaa vaziri Sergey Shoygu Qirg‘iziston va Tojikistonda joylashgan harbiy bazalarning jangovar tayyorgarligi oshirilishini aytdi. Bu haqda “RIA Novosti” xabar berdi.
Shoyguga ko‘ra, Rossiya AQSH va uning ittifoqchilari Markaziy Osiyodagi harbiy ishtirokini tiklashga urinishlari fonida shunday yo‘l tutmoqchi.
“AQSH va uning ittifoqchilari terrorizmga qarshi kurashda yordam berish bahonasida Markaziy Osiyoda o‘z harbiy mavjudligini tiklashga harakat qilmoqda. Biz mintaqa davlatlariga harbiy infratuzilmani joylashtirish bo‘yicha so‘rovlarni SHHT makonida barqarorlikka bevosita tahdid sifatida baholaymiz.
O‘z navbatida, Rossiyaning Qirg‘iziston va Tojikistondagi harbiy bazalari, shuningdek, yuzaga kelishi mumkin bo‘lgan tahdidlarga javoban boshqa kuchlarning jangovar tayyorgarligini oshiramiz”, — dedi Shoygu Nyu-Dehlida SHHTga a’zo davlatlar mudofaa vazirlari yig‘ilishida.
Shuningdek, Rossiya mudofaa vaziri Afg‘onistondagi hozirgi vaziyatga NATO javobgar ekanini ta’kidladi.
“Ular konfliktdan keyingi rekonstruksiyaning asosiy moliyaviy xarajatlarini o‘z zimmalariga olishi kerak”, — deydi Shoygu.
Shanxay hamkorlik tashkiloti (SHHT) — mintaqaviy xavfsizlik va iqtisodiy hamkorlik tashkiloti. 2001-yil 15-iyunda Xitoyning Shanxay shahrida 6 mamlakat — Qozog‘iston, Xitoy, Qirg‘iziston, Rossiya, Tojikiston va O‘zbekiston davlat rahbarlari uchrashuvida tuzilgan.
Izoh (0)