Россия мудофаа вазири Сергей Шойгу Қирғизистон ва Тожикистонда жойлашган ҳарбий базаларнинг жанговар тайёргарлиги оширилишини айтди. Бу ҳақда “РИА Новости” хабар берди.
Шойгуга кўра, Россия АҚШ ва унинг иттифоқчилари Марказий Осиёдаги ҳарбий иштирокини тиклашга уринишлари фонида шундай йўл тутмоқчи.
“АҚШ ва унинг иттифоқчилари терроризмга қарши курашда ёрдам бериш баҳонасида Марказий Осиёда ўз ҳарбий мавжудлигини тиклашга ҳаракат қилмоқда. Биз минтақа давлатларига ҳарбий инфратузилмани жойлаштириш бўйича сўровларни ШҲТ маконида барқарорликка бевосита таҳдид сифатида баҳолаймиз.
Ўз навбатида, Россиянинг Қирғизистон ва Тожикистондаги ҳарбий базалари, шунингдек, юзага келиши мумкин бўлган таҳдидларга жавобан бошқа кучларнинг жанговар тайёргарлигини оширамиз”, — деди Шойгу Нью-Деҳлида ШҲТга аъзо давлатлар мудофаа вазирлари йиғилишида.
Шунингдек, Россия мудофаа вазири Афғонистондаги ҳозирги вазиятга НАТО жавобгар эканини таъкидлади.
“Улар конфликтдан кейинги реконструкциянинг асосий молиявий харажатларини ўз зиммаларига олиши керак”, — дейди Шойгу.
Шанхай ҳамкорлик ташкилоти (ШҲТ) — минтақавий хавфсизлик ва иқтисодий ҳамкорлик ташкилоти. 2001 йил 15 июнда Хитойнинг Шанхай шаҳрида 6 мамлакат — Қозоғистон, Хитой, Қирғизистон, Россия, Тожикистон ва Ўзбекистон давлат раҳбарлари учрашувида тузилган.
Изоҳ (0)