Ўзбекистон президентининг Афғонистон бўйича махсус вакили Исматулла Эргашев ҳамда Буюк Британия бош вазирининг Афғонистон ва Покистон бўйича махсус вакили Энди Маккубри ўртасида видеоконференцалоқа шаклида учрашув бўлиб ўтди. Бу ҳақда “Дунё” агентлиги хабар берди.
.jpg)
ТИВ маълумотига кўра, суҳбат чоғида минтақавий хавфсизлик масалалари, жумладан, Афғонистондаги бугунги вазият, шунингдек, ушбу мамлакатдаги вазиятни тартибга солиш бўйича биргаликдаги саъй-ҳаракатлар муҳокама қилинган.
“Афғонистон янги ҳукумати халқаро ҳамжамиятнинг асосий талабларини бажариш, айниқса, аёллар ва қизларнинг меҳнат ва таълим олиш ҳуқуқларини таъминлаши зарурлиги қайд этилди”, — дейилади хабарда.
Энди Маккубри Ўзбекистоннинг Афғонистон бўйича яхлит минтақавий позицияни шакллантириш, мамлакатда узоқ муддатли тинчлик ва барқарорлик ўрнатиш, афғон халқига гуманитар ёрдам кўрсатиш борасидаги саъй-ҳаракатларини юқори баҳолаган.
Шунингдек, Ўзбекистон раҳбариятининг БМТ шафелигида Халқаро музокаралар гуруҳини тузиш ташаббусини амалга оширишга алоҳида эътибор қаратилган.
Тошкент шаҳрида 7 март куни Афғонистон билан қўшни давлатлар махсус вакилларининг биринчи учрашуви бўлиб ўтганди. Ўшанда Исматулла Эргашев “махсус вакиллар Афғонистондан мамлакатдаги аёлларга таълим олиш ва ишлаш ҳуқуқини қайтариб беришни талаб қилади”, деган эди.
Бир неча кун олдин Ўзбекистондан афғон халқига 185 тоннадан ортиқ зарурий озиқ-овқат маҳсулотлари ортилган навбатдаги инсонпарварлик ёрдами етказилгани тўғрисида хабар берилганди.
Изоҳ (0)