Украина Қуролли кучлари сафида Чеченистондан 150-200 га яқин аскар жанг қилмоқда. Эътиборлиси, улар асосан Биринчи ва Иккинчи Чечен урушларида қатнашган жангчиларнинг авлодларидир. Бу ҳақда Politico хабар берди.
Нашр маълумотларига кўра, Украина томонидаги урушда учта чечен бўлинмаси қатнашмоқда: Жохар Дудаев батальони, шайх Мансур батальони ва учинчиси Украина ҳарбий разведкаси билан ҳамкорлик қилувчи “махфийроқ” бўлинма. Унинг иштирокчилари қора кийинган ва Киевнинг хавфсиз чегараларида ҳам қуроллар билан ҳаракатланади.
Батальонлар Биринчи ва Иккинчи чечен урушларида қатнашган ва кейинчалик кўчиб кетган жангчиларнинг ўғиллари ва набираларидан иборат.
Politico суҳбатлашган икки чечен Чеченистон учун Украина томонида жанг қилаётганини айтган. Улар Украина билан можарода Россиянинг мағлубияти муқаррарлиги, бу Шимолий Кавказда қуролли қўзғолонга олиб келишини қўшимча қилган.
“Ишонинг, қачонки Россия Украина билан урушда мағлуб бўлса, у давлат сифатида мавжуд бўлиши мумкин эмас. У парчаланади”, — дейди исми аноним чечен жангчиси.
Уларнинг фикрича, кейинчалик Чеченистонда ҳарбий тўнтариш уюштириш учун Россия қуролли кучларини мағлуб этиш керак.
“Россия маст қўшнига ўхшайди. Бир куни у уйингизга келади ва уни ёқиб юбормоқчи бўлади. Сиз уни ушлайсиз, у қочиб кетади. Яна бир куни у ҳушёр бўлиб қайтиб келади ва кечирим сўрайди. Кейин эса маст ҳолда тўппонча билан қайтиб, хотин ва болаларингизни ўлдиради”, — дейди 45 ёшли Торто тахаллусли чечен қўмондони.
“Бу Учинчи Чечен уруши ва бу сафар биз ғалаба қозонамиз”, — дейди Мага тахаллусли 20 ёшли чечен. Ҳозирда улар асосан Бахмутдаги жангларда қатнашмоқда.
Бошқа хорижий тузилмалардан фарқли ўлароқ, чечен кўнгиллилари Украина халқаро легионига кирмайди.
2022 йил октябрь ойида Чеченистон раҳбари Рамзан Қодиров уруш зонасида Россия томонида 10 минг чечен жанг қилаётганини айтганди. Кейин у Чеченистондан яна 70 минг жангчининг фронтга боришга тайёрлигини эълон қилганди.
Изоҳ (0)