Ukraina G‘arbdan uni Rossiya agressiyasidan himoya qilish uchun ajratilgan harbiy yordam paketlarini, jumladan, harbiy texnika va qurollarning deyarli barchasini olib bo‘ldi. Bu haqda AQSHning Yevropadagi kuchlari qo‘mondoni general Kristofer Kavoli ma’lum qildi, deb yozmoqda “Ukrinform”.
AQSH generali Kongress Vakillar palatasining Qurolli kuchlar bo‘yicha qo‘mitasidagi tinglovlar chog‘ida shunday bayonot bergan.
“Jangovar mashinalarning 98 foizdan ortig‘i allaqachon o‘sha yerda. Ularga kerakli jihozlarni yetkazib berganimizga ishonchim komil, operatsiyalarni qo‘llab-quvvatlash ishlarini davom ettiryapmiz”, — dedi general Kavoli.
Shuningdek, u Amerika tomoni Ukraina Qurolli kuchlarining ustuvor ehtiyojlarini aniqlash va ularni o‘z vaqtida qondirish maqsadida Ukraina tomoni bilan doimiy aloqada ekaniga ishontirdi. Bundan tashqari, uning so‘zlariga ko‘ra, Yevroatlantika xavfsizligini mustahkamlash bo‘yicha yangi qadamlar joriy etilmoqda.
Kavoli hozirgacha 50 dan ortiq xalqaro donorlar tomonidan Ukrainaga ko‘rsatilgan moddiy yordam va harbiylarni tayyorlash mashg‘ulotlari Ukraina armiyasining muvaffaqiyatga erishishi uchun juda katta va hal qiluvchi ahamiyatga ega ekanini ta’kidladi.
Oxirgi safar 19-aprel kuni AQSH Ukrainaga 325 million dollarlik yangi harbiy yordam paketini e’lon qilgan edi. Yangi paket doirasida Qo‘shma Shtatlar Ukrainani HIMARS yoppasiga o‘t ochuvchi reaktiv tizimlari uchun qo‘shimcha o‘q-dorilar, artilleriya snaryadlari, tankka qarshi AT-4 qurollari, tankka qarshi minalar, to‘qqiz milliondan ortiq patronlar, aniq boshqariladigan aviatsiya o‘qlari va boshqalar bilan ta’minlaydi.
Vashington Kiyevga Rossiyaning keng ko‘lamli bosqini boshlanganidan beri 35 milliard dollardan ortiq harbiy va boshqa yordam ko‘rsatdi, deb yozgan o‘sha paytda Associated Press.
Izoh (0)