Saudiyaning Jizan shahri portidan chiqib ketganidan so‘ng Qizil dengizda bedarak yo‘qolgan Rossiya yaxtasi ekipaji aloqaga chiqdi. Bu haqda kema kapitani rafiqasi Nadejda Rasinaga tayanib, “TASS” xabar berdi.
Rasinaning so‘zlariga ko‘ra, yaxtachilar Yaman hududiy suvlarida ularga avtomat bilan qurollangan shaxslar hujum qilgani, bortga bir necha bor o‘q uzilganini aytgan. Ular Eritreya hududiy suvlarida xavfsiz bo‘lishga muvaffaq bo‘lgan.
“Eritreya rasmiylari tergov olib borgan. Ular endi aloqaga chiqdi, hammasi yaxshi ekanidan xabardormiz”, — deya qo‘shimcha qildi u.
“30 daqiqa” sayyohlik yaxtasi 17-aprel kuni dengizga chiqqan va Sharqiy Afrikadagi Jibuti davlatiga yo‘l olgan. Bortda uch nafar rossiyalik va bir nafar Misr fuqarosidan iborat ekipaj bo‘lgan.
Ekipaj 18-aprelga o‘tar kechasi aloqaga chiqqan, shundan so‘ng yaxta bilan aloqa uzilgan, jumladan, kemani kuzatish tizimi ham o‘chirilgan. Yaxta ekipaji aloqani to‘xtatganidan ikki kun o‘tgach, kema egasi SOS signalini berib, yaxta halokatga uchraganini aytgan.
Izoh (0)