Саудиянинг Жизан шаҳри портидан чиқиб кетганидан сўнг Қизил денгизда бедарак йўқолган Россия яхтаси экипажи алоқага чиқди. Бу ҳақда кема капитани рафиқаси Надежда Расинага таяниб, “ТАСС” хабар берди.
Расинанинг сўзларига кўра, яхтачилар Яман ҳудудий сувларида уларга автомат билан қуролланган шахслар ҳужум қилгани, бортга бир неча бор ўқ узилганини айтган. Улар Эритрея ҳудудий сувларида хавфсиз бўлишга муваффақ бўлган.
“Эритрея расмийлари тергов олиб борган. Улар энди алоқага чиқди, ҳаммаси яхши эканидан хабардормиз”, — дея қўшимча қилди у.
“30 дақиқа” сайёҳлик яхтаси 17 апрель куни денгизга чиққан ва Шарқий Африкадаги Жибути давлатига йўл олган. Бортда уч нафар россиялик ва бир нафар Миср фуқаросидан иборат экипаж бўлган.
Экипаж 18 апрелга ўтар кечаси алоқага чиққан, шундан сўнг яхта билан алоқа узилган, жумладан, кемани кузатиш тизими ҳам ўчирилган. Яхта экипажи алоқани тўхтатганидан икки кун ўтгач, кема эгаси SOS сигналини бериб, яхта ҳалокатга учраганини айтган.
Изоҳ (0)