“O‘zbektelekom” aksiyadorlik jamiyati 5–12-aprel kunlari lizing asosida 3,5 milliard so‘mga 4 ta miniven sotib oldi. “Daryo” lot hujjatlarini monitoring qilib, xarid bo‘yicha ma’lumot beradi.
Tenderni o‘tkazishdan maqsad “O‘zbektelekom” AJ hamda “O‘zmobayl” filiallari ehtiyojlari uchun miniven turdagi avtotransport vositalarini lizing asosida xarid qilish edi. G‘olib korxona 30 kun ichida belgilangan talablarga mos 4 ta miniven yetkazib berishi kerak.
Lotni yutish bo‘yicha 2 ta tadbirkorlik subyekti raqobatlashgan. Yakuniy natijalarga ko‘ra “Nano Lizing Kompaniyasi” MCHJ 99 ball bilan tender g‘olibi deb topilgan. Shartnoma summasi 2,8 milliard so‘m. Bundan kelib chiqadiki, bitta miniven uchun 700 million so‘m to‘lanadi.
Loyiha-smeta hujjatlarida transport vositasi uchun bir qator talablar belgilangan. Ammo qaysi rusumdagi miniven sotib olinishi haqida ma’lumot yo‘q. “Daryo” muxbiri holatni aniqlashtirish maqsadida “O‘zbektelekom” matbuot xizmati bilan bog‘landi. Berilgan ma’lumotda yozilishicha, “Davlat xaridlari to‘g‘risida”gi qonunga ko‘ra, tovarlarning xarid tavsifiga aniq tovar belgisiga doir talab va havolalar kiritilmasligi kerak.
“Transport vositasining markasi yoki modelini ko‘rsatishga haqimiz yo‘q. Texnik ko‘rsatkichlarini ko‘rsatamiz xolos. Shunga mos istalgan brend miniveni to‘g‘ri keladi”, — deya izoh berdi “O‘zbektelekom” matbuot xizmati rahbari Timur Mamajonov.
Uning aytishicha, minivenlardan muammoli vaziyatlarda avtostansiya sifatida foydalaniladi.
Izoh (0)