“O‘zbektelekom” aksiyadorlik jamiyati 3–10-aprel kunlari qurilish texnikasi ijaraga olish bo‘yicha boshlang‘ich narxi 246 million 100 ming so‘m bo‘lgan tender o‘tkazgan. “Daryo” muxbiri lot ma’lumotlarini ko‘zdan kechirish jarayonida xaridda raqobat uyushtirgan korxonalar o‘rtasida bog‘liqlik borligini aniqladi.
Tender “O‘zbektelekom”ning Samarqand filialidagi qurilish ishlari uchun ekskavator texnikasini ijaraga olish yuzasidan o‘tkazilgan. G‘olib korxona 60 kun muddatda mahsulotni yetkazib berishi kerak.
Lotni yutish uchun uchta korxona raqobatlashgan. Yakuniy natijaga ko‘ra, “Temur Gaz” MCHJ tender g‘olibi (shartnoma summasi 242 million 890 ming so‘m), “Trans Avto Oqsoy” MCHJ zaxira yetkazib beruvchi deb topilgan.
Tender ishtirokchisi bo‘lgan tadbirkorlik subyektlarining rahbariyati bilan tanishish jarayonida shubhali holat aniqlandi. Statistika agentligi ma’lumotlariga ko‘ra, g‘olib “Temur Gaz”ning 100 foizlik ta’sischisi Hakimov Do‘stmurod To‘ychiyevich hisoblanadi, rahbar esa Hakimov Sunnatulla To‘ychiyevich. E’tiborlisi, tenderda unga raqobat qilgan “Trans Avto Oqsoy” MCHJning ta’sischi va rahbari ham Hakimov Do‘stmurod To‘ychiyevich hisoblanadi.
“Davlat xaridlari to‘g‘risida”gi qonunning 68-moddasiga ko‘ra esa, tender ishtirokchisi faqat bitta taklif berishga haqli.
“Daryo” muxbiri holat yuzasidan izoh olish maqsadida g‘olib tadbirkor hamda “O‘zbektelekom” matbuot xizmati bilan bog‘landi. O‘zini Hakimov Do‘stmurod deb tanishtirgan shaxs haqiqatdan ham ikkala MCHJ o‘ziga tegishli ekanini tasdiqladi.
“Rostdan ham ikkisining ta’sischisi bir odam — men. Hakimov Sunnatulla esa akam bo‘ladi, u direktorimiz”, — dedi Hakimov Do‘stmurod To‘ychiyevich.
“O‘zbektelekom”ga lot bo‘yicha yuborilgan so‘rovga quyidagicha javob keldi:
“Tender xarid qilish tartib-taomillariga asosan o‘tkazilgan. Elektron tizim texnik talablariga binoan, xarid komissiyasi a’zolari hamda komissiya kotibi ishtirokchilar to‘g‘risidagi ma’lumotlar va ularning narx takliflarini ko‘rish imkoniyatiga ega emas, faqatgina takliflarni texnik jihatdan baholash funksiyasini bajaradi. Ishtirokchilar to‘g‘risidagi ma’lumotlar hamda ularning narx takliflari savdo jarayonlari to‘liq tugagandan so‘ng elektron tizim tomonidan oshkor qilinadi”.
Aksiyadorlik jamiyatining ma’lum qilishicha, ushbu lot bo‘yicha savdo natijalari 26-aprel kuni soat 09:52 da tugagan bo‘lib, aniqlangan affillanganlik holati yuzasidan g‘olib va zaxira tashkilotlari nomiga shartnoma imzolanmasi to‘g‘risida tegishli murojaatlar yuborilgan.
Izoh (0)