“Ўзбектелеком” акциядорлик жамияти 5–12 апрель кунлари лизинг асосида 3,5 миллиард сўмга 4 та минивен сотиб олди. “Дарё” лот ҳужжатларини мониторинг қилиб, харид бўйича маълумот беради.
Тендерни ўтказишдан мақсад “Ўзбектелеком” АЖ ҳамда “Ўзмобайл” филиаллари эҳтиёжлари учун минивен турдаги автотранспорт воситаларини лизинг асосида харид қилиш эди. Ғолиб корхона 30 кун ичида белгиланган талабларга мос 4 та минивен етказиб бериши керак.
Лотни ютиш бўйича 2 та тадбиркорлик субъекти рақобатлашган. Якуний натижаларга кўра “Нано Лизинг Компанияси” МЧЖ 99 балл билан тендер ғолиби деб топилган. Шартнома суммаси 2,8 миллиард сўм. Бундан келиб чиқадики, битта минивен учун 700 миллион сўм тўланади.
Лойиҳа-смета ҳужжатларида транспорт воситаси учун бир қатор талаблар белгиланган. Аммо қайси русумдаги минивен сотиб олиниши ҳақида маълумот йўқ. “Дарё” мухбири ҳолатни аниқлаштириш мақсадида “Ўзбектелеком” матбуот хизмати билан боғланди. Берилган маълумотда ёзилишича, “Давлат харидлари тўғрисида”ги қонунга кўра, товарларнинг харид тавсифига аниқ товар белгисига доир талаб ва ҳаволалар киритилмаслиги керак.
“Транспорт воситасининг маркаси ёки моделини кўрсатишга ҳақимиз йўқ. Техник кўрсаткичларини кўрсатамиз холос. Шунга мос исталган бренд минивени тўғри келади”, — дея изоҳ берди “Ўзбектелеком” матбуот хизмати раҳбари Тимур Мамажонов.
Унинг айтишича, минивенлардан муаммоли вазиятларда автостанция сифатида фойдаланилади.
Изоҳ (0)