Xalqaro kongress markazida ikkinchi Toshkent xalqaro investitsiya forumi boshlandi. Uning yalpi majlisida Shavkat Mirziyoyev nutq so‘zlamoqda. Bu haqda prezident matbuot kotibi xabar berdi.
“Men xorijiy kompaniyalar va tadbirkorlar bilan ko‘proq muloqot qilishga intilaman. Sizlarning g‘oya, taklif va tashabbuslaringiz menga kuch-g‘ayrat beradi, yangi islohotlarga undaydi. Shu bois, yangi-yangi investorlar bilan tez-tez uchrashuvlar o‘tkazishga, sizlarning yurtimizdagi yutuqlaringizni shaxsan kafolatlashga tayyorman”, — dedi prezident.
Investorlar huquqlarini sud orqali kafolatli himoya qilish borasida katta qadamlar qo‘yilayotgani qayd etildi. Bundan buyon, tadbirkor va investorlar sudda o‘z talabining to‘g‘riligini isbotlashi shart emas. Endi davlat idorasi o‘z qarorining qonuniyligini isbotlab berishga majbur bo‘ladi. Yuzaga kelgan har qanday noaniqliklar esa investorlar foydasiga hal qilinadi.
O‘zbekiston qonunlarida xalqaro arbitraj sudlari qarorlarini majburiy ijroga qaratish mexanizmlari mustahkamlab qo‘yildi.
“Joriy yilda ham tadbirkorlar huquqini himoya qilish bo‘yicha islohotlarimiz davom ettiriladi. Jumladan, xalqaro ekspertlar ko‘magida tariximizda ilk bor Xalqaro tijorat sudi faoliyati yo‘lga qo‘yiladi”, — dedi davlat rahbari.
Ta’kidlash kerakki, mamlakatda qo‘shilgan qiymat solig‘ini eksportchi korxonalarga 7 kun ichida qaytarish joriy qilindi, soliq va bojxonada o‘zaro hisobga olish yo‘lga qo‘yildi. Shu paytgacha investorlar 2 ta alohida tizim orasida sarson edi.
Bundan tashqari, xorijiy investorlarning aksiyalardan oladigan dividendlari uch yil muddatga soliqdan ozod qilindi, ular uchun daromad solig‘i 20 foizdan 12 foizga tushirildi.
Shavkat Mirziyoyev forum doirasida qator ikki tomonlama uchrashuvlar o‘tkazishi ham rejalashtirilgan. Umuman, tadbirda 70 mamlakatdan kelgan 2,5 mingga yaqin ishbilarmon doiralar va bank-moliya sohasi vakillari ishtirok etmoqda.
Izoh (0)