26-aprel kuni YouTube tarmog‘i va MY5 telekanali orqali “O‘zbekistonlik” filmining uchinchi epizodi premyerasi bo‘lib o‘tdi. Film tomoshabinlar tomonidan juda iliq kutib olindi. Buni YouTube’dagi izohlardan ham bilib olish mumkin.
Xususan, Izzatbek Ibragimov ismli foydalanuvchi “Men O‘zbekistonlikman, shu gapni mag‘rurlanib aytish har bir o‘zbekka nasib qilsin” deb yozgan. Boshqa bir foydalanuvchi Ro‘zimboy Olimboyev “Bu filmdagi qahramonlarga va sahna ortidagi tashkilotchi ishtirokchilarga katta rahmat. Mehnatingizni qadrlayman. Kutganimdek ajoyib chiqqan. Respekt”, deya izoh qoldirgan.
Filmning asosiy g‘oyasi bu maqsad sari olg‘a borish va bu orqali yoshlarga motivasiya berishdan iborat. Juda ko‘plab izohlarda bu fikrni uchratish mumkin. Jumladan, Nigina Sobirjonova ismli foydalanuvchi xuddi shunday izoh qoldirgan: “Bu soni ham juda ajoyib chiqibdi. Ancha kutilgan edi ko‘riboq sevindik. Ko‘rsatuv 1 soat bo‘lgan bo‘lsa-da, olam-olam taassurot, xulosa va fikrlar oldik. Ayniqsa ularning bosib o‘tgan yo‘llari va mashaqqatlari hamda berayotgan maslaxatlari bizni yanada ilm sari olg‘a borishga undayapti. Buning uchun tashkilotchilarga rahmat”.
Yana bir foydalanuvchi Farangiz To‘ychiyeva ham film unga katta ko‘mak berayotganini yozadi: “Har bir epizoddan motivatsiya olaman va O‘zbekiston farzandi ekanligimdan faxrlanaman. Oldimga yanada aniq va tiniq maqsadlar qo‘yishda o‘zimda kuch topaman. Alloh rozi bo‘lsin”, — degan u.
Filmni to‘liq quyidagi havola orqali tomosha qilish mumkin. Unda jahonning eng yirik neft-gaz kompaniyalaridan biri – Shellʼda IT-arxitektor sifatida faoliyat yuritayotgan Madina Berdiyeva va Strasburg filarmonik orkestrining musiqiy va badiiy rahbari Aziz Shohakimov haqida hikoya qilinadi.
Izoh (0)